Toshkent viloyatida fuqaro uyida yo‘lbars va piton ilonlarini saqlab kelayotgani aniqlandi, deb xabar bermoqda Ekologiya vazirligi.
Unda aytilishicha, Toshkent viloyati Ekologiya, atrof-muhitni muhofaza qilish va iqlim o‘zgarishi boshqarmasi, Bosh prokuratura, viloyat IIB hamda Milliy gvardiya xodimlari hamkorligida navbatdagi nazorat reyd tadbiri o‘tkazildi.
Reyd davomida Toshkent viloyati, Toshkent tumani, “Tutzor” MFYda yashovchi Sh.A. tomonidan yashash xonadonida noqonuniy ravishda 1 dona Amur yo‘lbarsi va 7 dona yo‘lbarssimon piton ilonlari saqlanayotgani aniqlandi. Yovvoyi hayvonlar Toshkent hayvonot bog‘iga topshirildi. Bosh prokuratura tomonidan holatga huquqiy baho berilmoqda.
Ma’lumot uchun, Vazirlar Mahkamasining “Yovvoyi hayvonlarni saqlash tartibini takomillashtirish chora-tadbirlari to‘g‘risida”gi 736-son qaroriga asosan, 2025-yil 1-yanvardan boshlab jismoniy shaxslar tomonidan ko‘pgina (ro‘yxat asosida) yovvoyi hayvonlarni tutqunlikda saqlash hamda sirk tomoshalarida yovvoyi hayvonlardan foydalanish ta’qiqlandi.
Ushbu yo‘nalishdagi ekologik nazorat tadbirlari Toshkent viloyatining boshqa hududlarida ham davom ettirilmoqda.
Toshkent shahri va Farg‘ona viloyatida ham qushlarning noqonuniy savdosiga chek qo‘yilgandi.
Bundan avval Xorazm viloyatining Urganch shahrida noqonuniy saqlanayotgan sher hayvonot bog‘iga topshirilgan edi. Shuningdek, Toshkent shahar Olmazor tumanida fuqaro o‘z uyida Qizil kitobga kiritilgan qushlarni saqlab kelayotgani aniqlangandi.
Izoh (0)