Oq uy Pentagonga va AQSH Aeronavtika va kosmik tadqiqotlar milliy boshqarmasiga (NASA) amerikalik milliarder Ilon Maskka tegishli SpaceX kompaniyasi bilan tuzilgan yirik davlat shartnomalarini o‘rganishni topshirdi. Bu haqda Reuters xabar bermoqda.
Bunday topshiriq idoralarga AQSH prezidenti Donald Tramp va Mask o‘rtasida avj olgan mojaro fonida berilgan. SpaceX va ma’muriyat o‘rtasidagi shartnomalarning umumiy qiymati taxminan 22 milliard dollarni tashkil etadi.
Buyruq haqida xabardor shaxslarning aytishicha, shartnomalarni tekshirish ma’muriyatga, agar Tramp yaqinda prezidentning bosh maslahatchisi va xarajatlarni qisqartirish bilan shug‘ullanuvchi Hukumat samaradorligi departamenti (DOGE) rahbari bo‘lgan Maskka qarshi chora ko‘rishga qaror qilsa, tezkor harakat qilish imkoniyatini beradi. Suhbatdoshlardan biri tekshiruv “siyosiy qurol uchun” o‘tkazilayotganini ta’kidlagan.
AQSH hukumatining amaldagi shartnomalarni qonuniy yoki amaliy jihatdan bekor qila olishi noaniq. Biroq bu ehtimollik boshqaruv sohasidagi mutaxassislarning siyosat va shaxsiy adovat davlat xazinasi, milliy xavfsizlik va jamoat manfaatlariga daxldor masalalarga noo‘rin ta’sir ko‘rsatishi mumkinligi haqidagi tashvishlarini yanada kuchaytirmoqda.
Mask va Tramp o‘rtasidagi mojaro iyun oyi boshida prezident tomonidan taklif qilingan xarajatlarni qisqartirish to‘g‘risidagi qonun loyihasi tufayli avj oldi. Tadbirkor bu loyihani “jirkanch razolat” deb atadi. Bunga javoban respublikachi tadbirkordan ko‘ngli qolganini aytib, uning kompaniyalariga ko‘rsatilgan yordamni eslatib o‘tdi.
Shundan so‘ng ma’lum bo‘lishicha, Mask Tramp bilan telefon orqali gaplashib, siyosatchiga nisbatan aytgan keskin so‘zlaridan pushaymon ekanini ommaga ma’lum qilishdan oldin muloqot qilgan. Manbalarga ko‘ra, milliarder Qo‘shma Shtatlar rahbariga qo‘ng‘iroq qilishdan avval AQSH vitse-prezidenti Jey Di Vens va Oq uy rahbari Syuzan Uayls bilan ham suhbatlashgan.
Izoh (0)