Samarqanddagi bog‘cha va maktablarda bo‘g‘ma ilon tomoshalari o‘tkazilgani aniqlandi. Bu haqda bolalar ombudsmani xabar berdi.
Ijtimoiy tarmoqlarda bog‘cha tarbiyalanuvchilari ko‘z o‘ngida bo‘g‘ma ilon bilan “Ilon o‘yini” tomoshasi videotasviri tarqalgandi. Mazkur holat alohida nazoratga olinib, bolalar ombudsmanining taʼlim muassasalarida tarbiyalanuvchilar va o‘quvchilar xavfsizligiga zid ravishda yovvoyi jonzot vositasida o‘tkazilgan bunday sirk tomoshasi holatiga huquqiy baho berish to‘g‘risidagi so‘rovi asosida holat IIV tomonidan o‘rganildi.
Aniqlanishicha, 24-oktyabr kuni Qo‘shrabot tumanida joylashgan maktabgacha taʼlim muassasasida Ishtixon tumanida yashovchi B.M. va I.B. MTM 60 nafarga yaqin tarbiyalanuvchilarining ko‘z o‘ngida bo‘g‘ma ilon bilan sirk tomoshasini namoyish qilgan.
B.M. faoliyat yurituvchi MCHJ tomonidan Qo‘shrabot tuman hududida 31-dekabrga qadar zamonaviy sirk tomoshalarini o‘tkazish uchun ruxsatnomasi bo‘lsa-da, uning doirasida “ilon o‘yini” ko‘zda tutilmagan.
Tekshirish davomida M.B. va B.I. tomonidan moddiy manfaatdorlik evaziga Qo‘shrabot tumanida joylashgan yana 8 ta umumtaʼlim maktablarda ham mazkur bo‘g‘ma ilon bilan sirk tomoshasi o‘tkazilgani aniqlangan (jami 840 nafar o‘quvchi tomoshabin bo‘lib ishtirok etgan).
Samarqand viloyati Ekologiya boshqarmasining ma’lum qilishicha, tomoshalarda foydalanilgan mazkur yo‘lbars pitoni Xalqaro Qizil kitobga kiritilgan. Uzunligi 2,78 metr eni 28 santimetr bo‘lgan ushbu jonzot O‘zbekistonga noqonuniy yo‘l bilan olib kirilgan.
26-noyabr kuni B.M. tomonidan noqonuniy ravishda saqlangan yo‘lbars pitoni mutaxassislar ishtirokida hujjatlashtirilib, viloyat Ekologiya boshqarmasiga tegishli tartibda topshirilgan.
Ayni paytda mazkur holat yuzasidan tergovga qadar tekshiruv harakatlari davom ettirilib, vaziyatga huquqiy baho berish yuzasidan qonuniy choralar ko‘rilmoqda.
Izoh (0)