Isroilning Eronga uyushtirayotgan hujumlari va uni davom ettirishga bergan va’dasi tufayli ko‘pchilik eronliklar xavfsizroq hududlarni izlab poytaxt Tehronni tark etmoqda. Bu haqda CNN xabar berdi.
Tehron shimolidagi Isroil zarbalaridan jabr ko‘rgan badavlat “Saodatobod” mahallasi fuqarosi CNN’ga kechasi bilan portlash ovozlari eshitganini aytgan. Ularning ba’zilari shu qadar kuchli ediki, butun ko‘p qavatli uyini larzaga keltirgan.
Yaqin atrofdagi binodan tutun hidini sezgan aholi yuqori qavatlardan pastga yugurib tushgani sababli tartibsizlik yuzaga keldi, dedi fuqaro. Yosh bolali oilalar ularni tinchlantirishga qiynalgan.
Isroildan farqli o‘laroq, Eron poytaxti Tehronda zamonaviy bombapanohlar yo‘q. Shuning uchun shahar 1980-yillardagi Eron-Iroq urushida foydalanilgan tunnellar, yerto‘lalar yoki eski boshpanalardan foydalanishi kerak, mamlakat oxirgi marta bunday og‘ir milliy favqulodda vaziyatga duch kelgandi.
Tehronda boshpanalar yo‘qligi sababli odamlar yerto‘lalarga tushgani va metrodan boshpana sifatida foydalanish mumkinligi aytilgan. Tehronda metro odamlar boshpana topishi uchun 15-iyun oqshomidan boshlab 24 soat ishlaydi, deya ma’lum qildi hukumat vakili. Maktablar va masjidlar ham ochiq bo‘lishi qo‘shimcha qilingan.
“Biz Eron rejimini qo‘llab-quvvatlamaymiz, biroq Isroilning turar joylar va tinch aholiga hujum qilishiga qarshimiz. Agar Isroil Eronning yadroviy dasturi va harbiy salohiyatiga qarshi bo‘lsa, ular o‘sha hududlarni nishonga olishi va G‘azoda sodir bo‘layotganidek yana bir vaziyat yaratmasligi kerak”, dedi bir tehronlik.
Tehronda qolganlar uchun kundalik hayot hozircha davom etmoqda. Oziq-ovqat do‘konlaridagi peshtaxtalar zaxiralar bilan to‘ldirilgan. Avtomobilga ega bo‘lganlar uchun gaz sotib olishga uzun navbatlar mavjud va xaridlar 25 litrdan oshmayotgani ma’lum qilingan. Naqd pul punktlari ishlamoqda, ammo ba’zilarida naqd pul olish miqdori cheklangan.
Poytaxtni tark etayotganlarning aksariyati shimolga, Kaspiy dengizi yaqinidagi qishloq va chekka hududlarga yo‘l olmoqda. Ammo yo‘llar shu qadar tirbandligidan harakatlanish qiyinligi aytilgan. Eronning janubiy-markaziy qismidagi Sheroz shahrida shahar atrofida gaz uchun uzun navbatlar yuzaga kelgan. Shuningdek, aholi oziq-ovqat, suv va tagliklar g‘amlamoqda.
Yakshanbaga o‘tar kechasi Erondan 200 dan ortiq raketa uchirilgani haqida xabar berilgan. Isroilda kamida 13 kishi, jumladan, 3 bola halok bo‘lgan.
Izoh (0)