Isroil armiyasi G‘azo sektorida yordam kutayotgan tinch aholiga qarata o‘t ochishi oqibatida kamida 20 falastinlik halok bo‘ldi, yuzlab odamlar yaralandi. Bu haqda Anadolu xabar berdi.
G‘azodagi Sog‘liqni saqlash vazirligi bayonotiga ko‘ra, Isroil qo‘shinlari eksklavning turli qismlarida tashkil etilgan gumanitar yordam tarqatish punktlari yaqinida bo‘lgan falastinliklarni nishonga olgan. Dastlabki ma’lumotlarga ko‘ra, hujumlar oqibatida kamida 20 kishi halok bo‘lgan, 200 dan ortiq kishi jarohatlangan, ulardan 50 nafarining ahvoli og‘ir.
Vazirlik barcha manfaatdor tomonlarni “och qolgan odamlar orasida o‘lim va og‘ir jarohatlarning oldini olish uchun” yordam yetkazishning boshqa mexanizmlarini topishga chaqirgan. Bayonotda, shuningdek, Isroil armiyasi Xon Yunus shahrining al-Mevasi hududida Xalqaro Qizil Xoch qo‘mitasiga qarashli dala gospitalini o‘qqa tutgani qayd etilgan.
Shifoxonadagi bemorlar, yaradorlar va tibbiyot xodimlarining hayoti xavf ostidaligi aytilmoqda. Sog‘liqni saqlash vazirligi Isroilning tibbiyot muassasalariga hujumlarini qoralagan.
27-maydan hozirgi kungacha Isroil va AQSH tomonidan gumanitar yordam zonalarida muntazam ravishda uyushtirilgan hujumlar natijasida kamida 274 falastinlik halok bo‘lib, yana 2 532 nafari yaralangan.
2023-yil 7-oktyabrda G‘azo sektorida ommaviy hujumlar boshlanganidan beri kamida 55 362 kishi halok bo‘lgan va 128 741 kishi yaralangan.
Izoh (0)