34 yoshli kanadalik xonanda va aktyor The Weeknd (Eybel Tesfaye) Los Anjeles o‘t o‘chiruvchilari hamda o‘rmon yong‘inlaridan jabr ko‘rgan insonlar uchun 1 million dollar xayriya qilishini aytdi.
U xayriya mablag‘ini bir nechta tashkilotlarga, jumladan, LAFD Foundation, GoFundMe’ning yong‘indagi yordam fondi va LA Regional Bank’ka yuborishini ma’lum qildi. Uning gumanitar yordam ishi AQSH Jahon oziq-ovqat dasturi va XO jamg‘armasi (xonandaga tegishli) bilan hamkorlikda amalga oshiriladi.
Shuningdek, The Weeknd Los Anjelesdagi Rose Bowl stadionida 25-yanvarga belgilangan konsert dasturini bekor qildi. 31-yanvarga qoldirilgan “Hurry Up Tomorrow” albomining premyerasini ham yana ortga surdi. Mazkur albom The Weeknd karyerasidagi oltinchi long pley hisoblanadi.
Ma’lumot uchun, The Weeknd so‘nggi besh yil ichida xayriya ishlariga taxminan 10 million dollar ajratgan.
Kaliforniyada o‘rmon yong‘inlari 7-yanvardan beri Tinch okeanining Paliseyds hududidan boshlanib, Malibu va Santa Monika kurort shaharchasiga tarqalmoqda. Ko‘plab mashhurlarning uylari yonib ketdi. Allaqachon uylarini yo‘qotgan mashhurlar orasida Peris Hilton, Anna Faris, Adam Brodi, Leyton Mister, Spenser Pratt va Heydi Montag, Jeyms Vuds, Jeymi Li Kertis, Yevgeniy Levi, Mayls va Kelli Teller, Jon Gudman va boshqalar bor. Jumladan, Entoni Hopkinsning 6 million dollarlik uyi ham yonib ketdi.
Izoh (0)