Meksika prezidenti Klaudiya Sheynbaum Los-Anjelesdagi tartibsizliklar ishtirokchilarining xatti-harakatlarini qattiq tanqid qilib, zo‘ravonlik norozilik shakli bo‘la olmasligini ta’kidladi va AQSHdagi meksikalik fuqarolarni provokatsiyalarga uchmaslikka chaqirdi.
“Biz mamlakatda norozilik ko‘rinishida sodir bo‘layotgan zo‘ravon harakatlarga mutlaqo qarshimiz. Patrul mashinalarini yoqib yuborish qarshilik ko‘rsatishdan ko‘ra provokatsiyaga o‘xshab ketadi. Shuni aniq aytish kerakki, biz zo‘ravonlikni, u qayerdan kelib chiqishidan qat’i nazar, qoralaymiz. Meksikalik fuqarolarni tinch yo‘l bilan harakat qilishga va provokatsiyalarga uchmaslikka da’vat etamiz”, dedi Sheynbaum Meksika hukumati tomonidan uzatilayotgan matbuot anjumanida.
Shu bilan birga, Meksika rahbari hukumatning migratsiya maqomidan qat’i nazar, chet eldagi meksikaliklarning huquqlarini himoya qilishga qat’iy sodiqligini ta’kidladi va AQSHni migratsiya jarayonlarida Meksika fuqarolarining huquqlariga rioya qilishga undagan.
“AQSH hokimiyatini barcha migratsiya jarayonlari tegishli huquqiy tartib-qoidalarga muvofiq, inson qadr-qimmati va qonun ustuvorligini hurmat qilgan holda o‘tkazilishini ta’minlashga qat’iy chaqiramiz”, deya qo‘shimcha qildi Sheynbaum.
Prezidentning aytishicha, Meksika “migratsiyani jinoyatlashtiruvchi va Qo‘shma Shtatlardagi jamoalarimiz xavfsizligi hamda farovonligiga tahdid soluvchi amaliyotlarga o‘z noroziligini bildirish” uchun barcha mavjud diplomatik va huquqiy vositalardan foydalanishni davom ettiradi.
AQSH immigratsiya va bojxona politsiyasining (ICE) 7-iyun kuni Los-Anjeles markazida noqonuniy muhojirlarni aniqlash bo‘yicha o‘tkazgan reydidan so‘ng namoyishchilar bilan to‘qnashuvlar yuz berdi. O‘sha kuni Kaliforniya gubernatori Gevin Nyusom shtat Tramp ma’muriyati tomonidan federal moliyalashtirishning ehtimoliy keng ko‘lamli qisqarishiga javoban federal soliqlarni to‘lashdan bosh tortishi mumkinligini aytib o‘tdi. Oq uy matbuot kotibi Karolin Levitt 8-iyun kuni namoyishlar fonida shaharga ikki ming kishilik milliy gvardiya kuchlari kiritilishini ma’lum qildi.
Kaliforniya gubernatori Gevin Nyusom AQSH prezidenti Donald Trampni norozilik namoyishlarini bostirish uchun Los-Anjelesga Milliy gvardiya yuborgani sababli sudga bermoqchiligini ma`lum qildi.
Izoh (0)