Economist Intelligence Unit tahliliy kompaniyasi ekspertlari Jahon yashash narxi reytingini yangiladi va yashash uchun eng qimmat shaharlar ro‘yxatini tuzdi. Butun dunyo bo‘ylab o‘rtacha yashash qiymati yil davomida 7,4 foizga oshgan.
CNN xabar berishicha, tahlilchilar uy-joy ijarasi, oziq-ovqat sotib olish, davolanish uchun to‘lov va boshqa zarur xarajatlar eng yuqori bo‘lgan dunyodagi eng “qimmat” shaharlarni aniqlagan. Reytingga 173 ta yirik shahar kiritildi. Reyting mualliflari 400 nomdagi turli tovar va xizmatlar narxlarini solishtirgan.
Shveysariyaning Syurix shahri va Singapur shahar-davlat birinchi va ikkinchi o‘rinlarni egallashdi. Uchinchi va to‘rtinchi o‘rinlar Nyu-York va Jenevaga nasib etdi. Ro‘yxatda keyingi o‘rinlardan Gonkong, Los-Anjeles, Parij, Tel-Aviv, Kopengagen va San-Fransisko joy olgan.
CNN ta’kidlaganidek, Rossiyaning Moskva va Sankt-Peterburg megapolislari joriy yilda reytingda keskin pastlab ketdi. Hozir ular mos ravishda 142 va 147 o‘rinlarni egallab turibdi. Shuningdek, Pekinda yil davomida yashash narxi pasaygan.
Dunyodagi eng arzon (lekin yashash uchun eng qulay bo‘lmagan) megapolis Suriyaning Damashq shahri bo‘lib qolmoqda. Shuningdek, ro‘yxatning eng quyi pog‘onasida Tehron va Tripoli joylashgan. Shunisi e’tiborga loyiqki, Venesuela poytaxti Karakas ushbu ro‘yxatdan chiqarib tashlangan, shaharda anomal inflyatsiya mavjud bo‘lib, u yerda narxlar 2023-yil boshidan buyon 450 foizga oshdi.
Tahlilchilarning fikricha, kommunal xizmatlar narxi AQSH shaharlarida eng yuqori. Yevropa shaharlarida esa ko‘ngilochar, jamoat transporti va uy-ro‘zg‘or buyumlari narxi eng yuqori. Osiyo shaharlarida bo‘lsa oziq-ovqat va spirtli ichimliklar eng yuqori narxga ega.
Umuman olganda, dunyo bo‘ylab yashash narxi oshib bormoqda. Bu jarayonga energiya resurslari narxining oshishiga olib kelgan qurolli to‘qnashuvlar va salbiy iqlim o‘zgarishlari ta’sir ko‘rsatgan, buning natijasida oziq-ovqat narxlari ko‘tarilgan. Shu bilan birga, ekspertlar 2024-yilda global inflyatsiyaning sekinlashishi kutilayotganini qayd etishmoqda.
Izoh (0)