Davlat aktivlarini boshqarish agentligi 9-iyun kuni Universal Mobile Systems (Mobiuz) ustav kapitalidagi 100 foiz davlat ulushini xususiylashtirish jarayoni boshlanganini e’lon qildi.
Xalqaro darajada xususiylashtirish jarayonini muvaffaqiyatli va samarali tashkil etish maqsadida Rothschild & Co xalqaro investitsiya banki bitim bo‘yicha yetakchi strategik va moliyaviy konsultant sifatida, KPMG xalqaro kompaniyasi — moliyaviy konsultant sifatida hamda moliyaviy, soliq va yuridik ekspertiza (vendor due diligence) o‘tkazish bo‘yicha, shuningdek, mustaqil baholovchi sifatida Deloitte xalqaro kompaniyasi jalb qilingan.
Xususiylashtirish jarayoni ochiq raqobat asosida amalga oshiriladi, unda mahalliy va xalqaro talabgorlar ishtirok etishi mumkin.
Savdo jarayoni uch bosqichda amalga oshiriladi:
- sotib olish bo‘yicha qiziqish bildirish (Expression of interest/ EoI);
- majburiyatga ega bo‘lmagan takliflarni qabul qilish (NBO);
- majburiyatga ega bo‘lgan takliflarni qabul qilish (BO).
Birinchi bosqichda talabgorlar ariza bilan birga, o‘zlari haqida ma’lumot (ro‘yxatdan o‘tganligi, faoliyat turi), ustav kapitalida 5 foizdan ortiq ulushga ega aksiyadorlar va yakuniy benefitsiarlar to‘g‘risida ma’lumot hamda so‘nggi 3 yillik moliyaviy hisobotni taqdim etishi kerak.
Arizalar moliyaviy resurslarning yetarliligi, xususiylashtirishda ishtirokini taqiqlovchi ma’muriy yoki boshqa sud jarayonlarining yo‘qligi, jinoiy faoliyatdan olingan daromadlarni legallashtirishga oid O‘zbekiston qonunchiligiga rioya etilishi asosida saralanadi.
Shu bilan birga, talabgorlar va ularning aksiyadorlari davlat kompaniyasi bo‘lmasligi, Yevropa Ittifoqi, AQSH hamda xalqaro moliya institutlarining sanksiyalari ro‘yxatiga kiritilmagan, sanksiyalarga qarshi faoliyatga jalb qilinmagan bo‘lishi kerak.
Talabgorlardan arizalar 2025-yil 1-avgust soat 18:00 gacha qabul qilinadi.
Mobiuz haqida
Universal Mobile Systems MCHJ O‘zbekistonda Mobiuz savdo belgisi ostida faoliyat yuritadigan telekommunikatsiya korxonasi bo‘lib, zamonaviy mobil uyali aloqa xizmatlari va mobil internet xizmatlarini 4G LTE, UMTS va GSM standartlarida taqdim etadi. 2024-yil yakuniga ko‘ra, korxonaning sof tushumi 2 086 milliard so‘m va abonentlari soni 7,8 million nafarni tashkil etadi. Shu o‘rinda, O‘zbekiston iqtisodining va aholisining hozirgi o‘sish surʼatlari bu bozorda katta imkoniyatlar borligidan dalolat beradi.
Prezidentning 2025-yil 21-aprelida imzolangan farmoniga asosan, sotiladigan yirik kompaniyalar ro‘yxatiga Mobiuz’dan tashqari UzAuto Motors, GTL, “O‘zmetkombinat” va boshqalar ham kiritilgan. 29 ta davlat ishtirokidagi yirik korxona ustav kapitalidagi aksiyalar paketini nufuzli xalqaro professional konsultantlarni jalb qilgan holda ommaviy savdolarga chiqarish belgilangan.
Izoh (0)