Dunyo bo‘ylab o‘tkazilgan yangi so‘rovnoma natijalariga ko‘ra, Nyu-York va Singapur yashash uchun eng qimmat shaharlar deb topildi. Bu haqda Bloomberg xabar berdi.
Economist Intelligence Unit (EIU)ning Worldwide Cost of Living hisobotiga ko‘ra, dunyoning 172 ta yirik shaharlarida yashash narxi o‘tgan yil davomida o‘rtacha 8,1 foizga oshgan. Bunga Ukrainadagi urush va ta’minot zanjiridagi keskinliklar sabab bo‘lgan.
Ushbu reytingda o‘tgan yili uchinchi o‘rinni egallagan Tel-Aviv o‘z o‘rnini saqlab qoldi, Gonkong va Los-Anjeles esa yashash uchun eng qimmat shaharlar beshligini yakunladi.
Osiyo shaharlarida boshqa joylarda kuzatilgan narxlarning keskin ko‘tarilishi yuz bermadi.
Reytingda kuzatilgan asosiy o‘zgarishlar quyidagicha:
- Tokio va Osakada foiz stavkalari pastligicha qolib, mos ravishda 24 va 33-pog‘onaga tushib ketdi.
- Suriya poytaxti Damashq va Liviyaning Tripoli shahri dunyodagi eng arzon joylar sifatida qayd etildi;
- Sidney kuchli eksport milliy valyuta kursini ko‘targanligi sababli kuchli o‘ntalikka kirdi;
- San-Fransisko o‘tgan yilgi 24-o‘rnidan 8-o‘ringa ko‘tarildi;
- Xitoyning eng qimmat oltita shahri reytingda yuqoriga ko‘tarildi, Shanxay esa kuchli yigirmatalikka kirdi.
Ukrainadagi urush, G‘arbning Rossiyaga nisbatan sanksiyalari va Xitoyning zero Covid siyosati ta’minot zanjiri muammolarini keltirib chiqardi. Ular foiz stavkalarining ko‘tarilishi va valyuta kursining o‘zgarishi bilan birgalikda butun dunyo bo‘ylab yashash xarajatlari inqiroziga olib keldi, — deydi EIU’ning butun dunyo bo‘ylab yashash narxi bo‘yicha rahbari Upasana Dutt.
Unga ko‘ra, ro‘yxatdagi 172 shaharda 20 yil ichida kuzatilgan eng kuchli o‘rtacha narxlarning o‘sishi qayd etildi.
Joriy yilning avgust va sentabr oylarida o‘tkazilgan so‘rovnomada dunyoning 172 shahridagi 200 dan ortiq mahsulot va xizmatlar bo‘yicha 400 dan ortiq individual narxlar taqqoslangan.
2022-yildagi dunyoning eng qimmat 10 ta shaharlari:
- Singapur — 1;
- Nyu-York, AQSH — 1;
- Tel-Aviv, Isroil — 3;
- Gonkong, Xitoy — 4;
- Los-Anjeles, AQSH — 4;
- Syurix, Shveysariya — 6;
- Jeneva, Shveysariya — 7;
- San-Fransisko, AQSH — 8;
- Parij, Fransiya — 9;
- Kopengagen, Daniya — 10;
- Sidney, Avstraliya — 10.
Avvalroq ekspatlar uchun yashash va ishlash sharoiti eng qulay shaharlar reytingi e’lon qilingandi.
Izoh (0)