Jizzax viloyati hududidan o‘tgan xalqaro ahamiyatga ega M-39 avtomobil yo‘lida uchta avtomobil ishtirokida yo‘l-transport hodisasi sodir bo‘ldi. Bu haqda viloyat IIB axborot xizmati xabar berdi.
Ma’lum qilinishicha, 3-iyun kuni 07:30 larda Jizzax viloyati hududidan o‘tgan avtomobil yo‘lida Lacetti haydovchisi belgilangan tezlik me’yorlariga amal qilmasdan harakatlanishi va Nexia-3 avtomobil haydovchisining e’tiborsizligi yo‘l-transport hodisasiga sabab bo‘lgan. Ya’ni Lacetti avtomobili katta tezlikda Nexia-3 ning orqa yon tomonidan, bundan tashqari, o‘z yo‘nalishida harakatlanib kelayotgan Damas’ning orqa qismidan urib yo‘l chetiga chiqib ketgan.
“Soatiga 100 kilometr tezlikda kelayotgan edim, yo‘lim ochiq edi, lekin Nexia-3 oldimdan chiqib qoldi”, — deydi Lacetti haydovchisi. E’lon qilingan lavhadan ko‘rish mumkinki, ushbu haydovchi mashinasi saloniga mol charvisini ortib olib, yuk ortish qoidalarini ham buzgan.
To‘qnashuv oqibatida Nexia-3 haydovchisi boshqaruvni yo‘qotib yo‘lni ikkiga ajratib turuvchi beton to‘siqqa urilib, ag‘darilgan. Mashina haydovchisi va yo‘lovchisiga birinchi tez tibbiy yordam ko‘rsatilgan.
Avvalroq Qashqadaryoda Lacetti yo‘lni kesib o‘tayotgan velosipedchini urib yuborgani, Toshkentda tezlikni oshirgan Cobalt yo‘l chetidagi beton ustunga borib urilgani, Jizzaxda taksi haydovchisi uxlab qolishi oqibatida YTHga uchrab, halok bo‘lgani to‘g‘risida xabar berilgandi.
Izoh (0)