Toshkent shahrida mast holda mashina boshqarib, 11 yoshli qizning o‘limiga sababchi bo‘lgan haydovchiga hukm o‘qildi. 

Ish hujjatlarida keltirilishicha, 2022-yil dekabr oyida sudlanuvchi 4 nafar yo‘lovchi bilan mast holda Lacetti boshqarib ketayotgan bo‘lgan. Mazkur haydovchi Cobalt bilan to‘qnashuv sodir etgan. YTH oqibatida Cobalt‘da bo‘lgan 11 yoshli qiz shifoxonada vafot etgan. Sudlanuvchi o‘z aybiga to‘liq iqror ekanligini bildirdi. 

“Pushaymonman, aybimga to‘liq iqrorman. Mening ham uch nafar voyaga yetmagan farzandim bor. Farzandining rasmini ko‘rib qolgan edim, hali-hali ko‘z oldimdan ketmayapti. Imkon yaratib berishsa, kerak bo‘lsa, tiz cho‘kib kechirim so‘rayman. Sababchi bo‘lib qoldim”, — deydi aybdor. 

Sudlanuvchi Jinoyat kodeksining 266-moddasi 2-qismi bilan aybli deb topildi va ikki yil avtomobil boshqarish huquqidan mahrum qilingan holda 6 yil muddatga ozodlikdan mahrum qilish jazosi tayinlandi.