Surxondaryo viloyatining Jarqo‘rg‘on tumanida 17-sentabr kuni avtomobil va yo‘lovchi poyezdi to‘qnashib ketdi. Bu haqda Surxondaryo viloyat IIB YHXB axborot xizmati rahbari Elnur Abrayev “Daryo”ga maʼlum qildi.
Holat Jarqo‘rg‘on tumanida temiryo‘lning 9-piketidagi kesishmasida sodir bo‘lgan.
“Haydovchi A.O‘. o‘zining boshqaruvida bo‘lgan Nexia rusumli avtomashinasi bilan temiryo‘lning 9-piketidagi kesishmasidan o‘tayotgan vaqtda avtomashinaning divigateli o‘chib qoladi. Natijada Sariosiyo-Termiz yo‘nalishida harakatlanib kelgan yo‘lovchi poyezdi bilan to‘qnashib, yo‘l transport hodisasini sodir etgan”, — dedi Elnur Abriyev.
Guvohlardan birining “Daryo”ga maʼlum qilishicha, to‘qnashuv vaqtida mashinadan gaz sizib chiqqan.
“Hamma o‘zini chetga oldi. Ana portlab ketadi, mana portlab ketadi deb turgan joyimizda ichki ishlar va temiryo‘lchi xodimlar chopib kelib, behush yotgan haydovchini mashinadan olib chiqishdi”, – dedi guvoh.
Maʼlum bo‘lishicha, hushsiz yotgan yo‘lovchiga temiryo‘l xodimi Muzaffar Aliyarov hamda ichki ishlar xodimi, serjant G‘ayrat Sa’dullayev yordam bergan.
“Poyezd ekstrniy tormozlaganidan so‘ng, chang ichida avtomashina ag‘darilib yotganini ko‘rgan. Avtomashinada gaz chiqayotgani bois fuqarolar yaqiniga bormagan. Shu payt ikkala xodim borib, gazni o‘chirib, avtomashina saloni ichidagi haydovchini chiqarib olgan”, – deyiladi IIB maʼlumotida.
Qo‘shimcha qilinishicha, haydovchi olgan yengil tan jarohati bilan tuman kasalxonasiga murojaat qilgan. Hozirda fuqaroning sog‘ligi barqaror.
Avvalroq Surxondaryoda Cobalt va Lacetti haydovchilari yo‘l talashib jarlikka qulab tushgan holati bo‘yicha maʼlumot berilgan edi.
Izoh (0)