Qo‘stanay viloyatining Olmaota—Yekaterinburg trassasida 20-may kuni mikroavtobus yuk mashinasi bilan to‘qnashdi. Hodisa oqibatida olti kishi halok bo‘ldi. Bu haqda viloyat ichki ishlar boshqarmasi xabar berdi.
Hodisa “Qayroq” chegara postidan ikki kilometr uzoqlikda yuz bergan. Ford Transit mikroavtobusi 10 nafar yo‘lovchini olib ketayotgan bo‘lgan. Hodisa oqibatida olti kishi voqea joyida halok bo‘lgan. Ular qaysi davlat fuqarolari ekani haqida ma’lumot berilmagan.
Besh kishi turli tan jarohatlari bilan Qorabaliq tuman kasalxonasiga yetkazilgan. YTH yuzasidan Qozog‘iston Jinoyat kodeksining 345-moddasi 4-qismi (ikki yoki undan ortiq shaxsning o‘limiga sabab bo‘lgan transport vositalari harakati yoki ulardan foydalanish qoidalarini buzish) bilan jinoyat ishi qo‘zg‘atilib, tergov harakatlari olib borilmoqda. Hodisa joyida tergov-tezkor guruhi ishlamoqda.
Mart oyida Qozog‘istonda 33 nafar o‘zbekistonlik bo‘lgan avtobus YTHga uchragan edi. Hodisa 2-martga o‘tar kechasi Samara—Chimkent trassasida yuz bergan. Yo‘lovchi avtobusiga yuk mashinasi kelib urilgan. Avtobus Ufadan Samarqand shahriga ketayotgan bo‘lgan. YTH oqibatida hech kim jabrlanmagan.
Izoh (0)