AQSh prezidenti Donald Tramp tomonidan Iqlim bo‘yicha Parij kelishuvidan chiqishning e’lon qilinishi kutilmagan oqibatlarga olib keldi. Borgan sari ko‘proq amerikalik millionerlar ekstremal ob-havo sharoitlari yuzaga kelish ehtimolining oshishidan xavfsirab maxsus barpo etilgan boshpanalarga qiziqish bildirmoqda, deb yozadi “Gazeta.ru”.
Oxirgi vaqtlarda tobora ko‘proq amerikalik millionerlar turli toifadagi halokatlar — qutblar siljishidan tortib yadro urushiga tayyorgarlik ko‘rishni boshlamoqda. Bunday tayyorgarlikning bosqichlaridan biri sayyoraning nisbatan xavfsizroq hududlaridan yer xarid qilish ko‘rinishida kechmoqda.
AQShning markaziy qismi — Kolorado, Montana, Nebraska, Nyu-Meksiko, Shimoliy Dakota, Texas va Vayoming kabi shtatlari “oxir zamon”dan keyingi keskin sharoitlarda yashash uchun mos keladi deb hisoblanadi. Ularda iqlim yumshoqroq bo‘lib, okeanlar (qutblar eriy boshlagan holatda keng ko‘lamli suv toshqinlariga sabab bo‘lishi mumkin bo‘lgan) esa ancha uzoqda joylashgan.
Forbes ma’lumotiga ko‘ra, ushbu shtatlarda allaqachon amerikalik boyvachchalar tomonidan barpo etilgan bir nechta mustahkam bombapanohgoh mavjud.
LinkedIn asoschilaridan biri va mashhur investor Reyd Xoffman The New Yorker nashriga joriy yilning yanvarida bergan intervyusida hikoya qilishicha, Kremniy vodiysidagi 50 foizdan ortiq milliarderlar o‘ziga xos “apokalipsisdan sug‘urta”, masalan, yerosti bunkerlari xarid qilgan.
Forbes jurnalisti Jim Dobsonning so‘zlariga qaraganda, ko‘pchilik millionerlar istalgan daqiqada boshpanaga qochish uchun tayyor samolyotlarga ega, bunkerlarda esa avtomobillar, motosikllar, qurol-yarog‘ va elektr energiyasining avtonom generatorlari bor.
Biroq hozircha hech bir milliarder markaziy shtatlardan sotib olingan katta o‘lchamdagi yerlar apokalipsisga tayyorgarlik ko‘rish uchun xarid qilinganligini tan olmadi.
O‘z daromadini kabel va kommunikatsiya texnologiyalari sohasi orqali qo‘lga kiritgan Jon Meloun AQShda yirik xususiy yer egalaridan biri hisoblanadi. Unga tegishli bo‘lgan olti shtatdagi hudud 2,2 million akrdan (9 ming kvadrat metr atrofida) oshadi. Bu esa Delaver shtati maydonidan ikki barobar yoki Manxetten orolidan 151 marta kattaroqdir. 2011-yilda Meloun Forbesga yerlarni xarid qilish odatiy investitsiya ekanligi va o‘z yerlarida baliq ovlash, ba’zan esa qushlarni ovlashni xush ko‘rishini ma’lum qilgan edi.
Mediamagnat Ted Terner Kolorado, Kanzas, Montana, Nebraska, Nyu-Meksiko va Janubiy Dakotada 2 million akr (8 ming kvadrat kilometr) yer maydoniga ega. Ana shunday katta yer egalaridan yana biri Amazon rahbari Jeff Bezosdir.
Ko‘chmas mulk sotishga ixtisoslashgan kompaniyalar bunday qulay vaziyatni qo‘ldan chiqarmasdan, qiymati uch million dollardan boshlanuvchi premium klassdagi boshpanalarni tobora ko‘proq qurmoqda.
Harbiy bazalar yoki raketa uchirish uchun mo‘ljallangan konlarda qurilgan mazkur uylar maxsus xavfsizlik funksiyalari, masalan yadro portlashidan himoya qiluvchi eshiklar, zirhli avtomobillar hamda oziq-ovqat va suv zahiralariga ega.
Dallas yaqinida (Texas shtati) bir yo‘la 400 ta yerosti ko‘p xonadonli uy (1 600 odamga mo‘ljallangan) qurilmoqda. Ularning bahosi 300 million dollardan boshlanadi. Uning yaratuvchilari Trident Lakes loyihasini to‘liq jangovar shaylikdagi besh yulduzli kurort deb atamoqda. 700 akr (uch kvadrat kilometr) maydonda nafaqat uylar, balki golf uchun maydon, spa-markaz, basseynlar, yugurish yo‘lakchalari, ot sporti kompleksi, do‘konlar va restoranlar ham joylashadi. The Houston Chronicle ma’lumotiga ko‘ra, aholi u yerda 2018-yildan yashay boshlashi mumkin.
Shuni ta’kidlash joizki, mazkur uylar erkin sotuvda paydo bo‘lmasa kerak. Hozircha quruvchi kompaniyalar shaxsiy taklifnomalarni tarqatmoqda, qolgan istovchilar uchun saytda maxsus anketa to‘ldirish taklif etilmoqda. Unda yoshi, ma’lumoti, sudlanganlik va hatto ekstremal vaziyatlarda o‘zini qanday tutishi haqidagi savollarga javob berish kerak bo‘ladi.
Izoh (0)