Bloomberg moliya olamidagi eng nufuzli shaxslar nomini oshkor etdi

Bloomberg agentligi moliya olamidagi eng nufuzli 50 shaxsdan iborat reytingni e’lon qildi. Ushbu reytingga birinchi marta Rossiya prezidenti Vladimir Putin kiritildi. Birinchi o‘rinni Buyuk Britaniya bosh vaziri Tereza Mey egallagan bo‘lsa, ikkinchi o‘rinni AQSh prezidentligiga nomzodlar Donald Tramp va Hillari Klinton bo‘lishib oldi.

Reytingning dastlabki o‘nligi — “RBK” fotojamlanmasida.

1. Tereza Mey — Buyuk Britaniya bosh vaziri

Buyuk Britaniyaning yangi bosh vaziri Bloomberg tahlilchilarini Brexit masalasidagi dadilligi bilan hayron qoldirdi. Avval boshida u Buyuk Britaniyaning Yevropa Ittifoqi tarkibidan ajralishiga qarshi chiqayotgan edi. Agentlikning fikricha, Londonning Yevropa moliya markazi sifatidagi mavqei yangi bosh vazir biznes bilan qay darajada muvaffaqiyatli kelishib olishiga bog‘liq.

2. Donald Tram — AQSh prezidentligiga nomzod

AQSh prezidenti sifatida kim saylanishi jahon moliya bozorining kelajagini ko‘p jihatdan belgilab beradi. Bloomberg prezidentlikka da’vo qilayotgan milliarder davlat qarzi va erkin savdo-sotiq muammolarini qanday hal qilishini qiziqish bilan kuzatishini bildirib o‘tdi.

3. Hillari Klinton — AQSh prezidentligiga nomzod

Agar saylovlarda Klinton xonim g‘alaba qozonsa, u holda sobiq davlat kotibi yuritadigan siyosatning asosiy vazifalaridan biri soliqqa tortish tizimini qayta ko‘rib chiqish bo‘ladi.

4. Si Szinpin — Xitoy raisi

Xitoy raisining bundan buyon YaIM tushishi va davlat qarzining o‘sishiga yo‘l qo‘ymaslik haqidagi va’dasi jahon moliya bozori barqarorligi uchun juda muhim ahamiyatga ega, deb hisoblaydi Bloomberg. Agar ushbu va’da bajarilmasa, bozor qulaydi.

5. Jeff Bezos — Amazon asoschisi

Bezosning ta’siri va mavqei oxirgi paytlarda yaqqol sezilmoqda. Hozircha uning birorta raqibi natijalariga ko‘ra Bezosga yaqinlasha olmadi. Tadbirkorning shaxsiy boyligi ham o‘sib bormoqda — joriy yilda u 68 milliard dollar pul bilan Bloomberg versiyasi bo‘yicha jahonning uchinchi eng boy insoni deb topildi.

6. Angela Merkel — Germaniya kansleri

Merkel xonimning muhojirlar masalasidagi siyosati uning pozitsiyasiga bir qadar putur yetkazdi. Uning partiyasi — “Xristian-demokratik ittifoq”ning saylovlardagi natijalariga ko‘ra xulosa qilinsa, Merkel 2017-yilda qayta saylanishi shubha ostida qoladi, deb hisoblaydi agentlik ekspertlari. Shunga qaramay, hozircha Yevropaning eng yirik iqtisodiyotini boshqarishda uning o‘rnini egallaydigan biror jiddiy raqobatchi yo‘q.

7. Mario Dragi — Yevropa markaziy banki rahbari

Dragi Yevropa markaziy bankini qo‘rqitish befoydaligini ko‘rsatdi: Britaniya Ittifoq tarkibidan chiqishga qaror qilganida u “pinagini ham buzmadi”, lekin bu qadam Yevropa iqtisodiyotiga zarar keltirishini aytib o‘tdi. Yaqin yillarning barqaror kelish-kelmasligi aynan shu shaxsga bog‘liqdir.

8. Janet Yellen — AQSh Federal zaxira tizimi raisi

O‘z navbatida, AQSh iqtisodiyotining barqarorligi Yellen xonimga bog‘liq. Mamlakat iqtisodiyotining o‘sishi ko‘p jihatdan Yellenning asosiy stavkani boshqarish bo‘yicha sokin va ishonchli xatti-harakatlari tufayli davom etmoqda.

9. Uorren Baffet — amerikalik investor

Baffet o‘z sohalarida yetakchi o‘rinni egallab kelayotgan kompaniyalarga muvaffaqiyatli investitsion kiritmalari tufayli to‘qqizinchi o‘ringa munosib ko‘rildi.

10. Serjio Moro — Braziliya federal sudyasi

Aynan Moro o‘z prokurorlari jamoasi bilan birgalikda Braziliyani retsessiyaga, mamlakat sobiq prezidenti Dilma Russeffni esa impichmentga olib kelgan korrupsion janjalni ikki yil davomida tergov qildi.