AQSHdagi prezidentlik saylovlarida Donald Tramp g‘alaba qozongan taqdirda milliarder Ilon Maskni o‘zining maslahatchisi etib tayinlamoqchi. Bu haqda manbalarga tayanib, Wall Street Journal (WSJ) xabar berdi.
Ma’lum qilinishicha, Tramp chegara xavfsizligi va iqtisodiyot bilan bog‘liq siyosatlarga rasmiy ta’sir ko‘rsatish bo‘yicha Mask bilan muzokara o‘tkazgan. Milliarder ham so‘nggi paytlarda ushbu masalalar bo‘yicha ochiq gapirmoqda.
“Mask va yana bir milliarder investor Nelson Pelts elita doiralarida amaldagi prezident Jo Baydenning qayta saylanishini qo‘llab-quvvatlamaslikka ko‘ndirish uchun kampaniya olib bormoqda”, — deyiladi xabarda.
Ikki yil oldin Tramp va Mask o‘rtasidagi munosabatlar keskin edi. Ikkalasi ham omma oldida bir-birini haqorat qilgandi, ammo endi ular o‘rtasida do‘stona aloqalar o‘rnatilmoqda.
Manbalarga ko‘ra, Tramp va Mask oyiga bir necha marta telefonda muloqot qilgan. Ular immigratsiya, texnologiya, ilm-fan, shuningdek, AQSH kosmik kuchlarini rivojlantirish masalalari haqida gaplashgan. Xabarda Trampning go‘yoki milliarderga Marvel sobiq rahbari Ayl Perlmutterning vazifasiga o‘xshash rolni taklif qilgani haqida gap boradi.
Perlmutter Tramp prezidentligida faxriylar ishlari bo‘yicha Departament maslahatchisi bo‘lib ishlagan. Mask Tramp prezidentligi davrida Oq uyning biznes bo‘yicha maslahat guruhlarida ishlagan, biroq 2017-yilda Trampning AQSHni iqlim bo‘yicha Parij kelishuvidan chiqarish qaroriga rozi bo‘lmagani sababli iste’foga chiqqandi.
Izoh (0)