Bloomberg Billionaires Index ma’lumotlariga ko‘ra, Microsoft kompaniyasining sobiq bosh direktori Stiv Balmerning boyligi birinchi marta 100 milliard dollardan oshdi.
Bloomberg qayd etishicha, 7-iyul kun davomida biznesmenning boyligi 731 million dollarga o‘sib, 101 milliard dollarga yetgan. Natijada u boyligi 100 milliard dollardan ortiq bo‘lgan dunyodagi to‘qqizinchi odamga aylandi. 2000-yildan 2014-yilgacha Microsoft bosh direktori bo‘lgan Balmer hozirda Los Angeles Clippers basketbol klubiga egalik qiladi.
Oracle asoschilaridan biri Larri Ellison boyligi 100 milliard dollardan oshgan o‘ninchi odam bo‘lishiga bir baxya qoldi. 7-iyul kungi savdo yakunlariga ko‘ra, uning boyligi 2,24 milliard dollarga ko‘payib, 98,6 milliard dollarga yetgan.
Amazon asoschisi Jeff Bezos dunyodagi eng boy odamlar reytingida yetakchi bo‘lib qolmoqda. Bloomberg xabariga ko‘ra, biznesmenning boyligi 212 milliard dollarga baholanmoqda, bu rekord ko‘rsatkich. Agentlikning ta’kidlashicha, bunday o‘sishga Pentagonning 2019-yilda Microsoft bilan tuzgan 10 milliard dollarlik “bulutli” saqlash infratuzilmasini yaratish bo‘yicha shartnomaning bekor qilishi haqidagi yangiliklar ham ta’sir ko‘rsatgan.
Ulardan keyin Alphabet asoschilari Larri Peyj va Sergey Brin (mos ravishda 115 milliard va 111 milliard dollar) turibdi. Sakkizinchi o‘rinda 101 milliard dollarlik boyligi bilan amerikalik investor Uorren Baffett bormoqda.
Izoh (0)