AQSHning saylangan prezidenti Donald Tramp AQSh moliya vaziri lavozimiga investor Skott Bessent nomzodini ilgari surdi.
Tramp bu haqda Truth Social ijtimoiy tarmog‘ida yozgan.
“Skott geosiyosat va iqtisodiyot sohalarida yetakchi xalqaro investor va strateglardan biri sifatida hurmatga sazovor”, deyiladi bayonotda.
Hozirda AQSH moliya vaziri lavozimida Janet Yellen faoliyat yuritmoqda.
Bessentning nomzodi ilgari surilishidan oldin Respublikachilar jamoasi ichida shiddatli ichki kurash kechdi. Amerika matbuoti xabarlariga ko'ra, Bessentdan tashqari, Federal rezerv boshqaruv kengashining sobiq a'zosi Kevin Uorsh, Apollo Global Management investitsiya kompaniyasi egasi Mark Rouen, Tennessi shtatidan respublikachi senator Bill Xeygerti va AQShning savdo bo'yicha bosh muzokarachisi Rober Laytxayzer bu lavozim uchun kurashayotgan edi.
Wall Street Journal nashri manbalariga tayanib, Bessentning ittifoqchilari “sahna ortida kampaniya uyushtirgani” va saylangan prezidentni uni tanlashga ishontira olganini yozadi. Bessentning nomzodi, jumladan, Trampning birinchi prezidentlik davrida Oq uy Milliy iqtisodiy kengashi rahbari Lourens Kudlou tomonidan qo‘llab-quvvatlandi.
Avvalroq Ilon Mask va yana bir tadbirkor Vivek Ramasvami Trampning bo‘lajak administratsiyasida ish boshlashi kutilayotgani ma’lum qilingandi.
"Birgalikda bu ikki ajoyib amerikalik mening ma’muriyatim uchun davlat byurokratiyasini demontaj qilish, ortiqcha qoidalarni, keraksiz xarajatlarni kamaytirish va federal agentliklarni qayta tashkil etish yo‘lini ochib beradi", degan Tramp.
Izoh (0)