AQSHning saylangan prezidenti Donald Tramp (20-yanvar kuni lavozimga kirishadi) o‘zining hazilomuz kriptovalyutasini ishga tushirdi. Siyosatchi Truth Social va X’dagi akkauntlarida tegishli postlarni e’lon qildi.
$TRUMP (Official Trump) kriptovalyutasining narxi bir sutkadan kamroq vaqt ichida 578 foizga ko‘tarilib, savdolarning umumiy hajmi 10 milliard dollardan oshdi. U ishga tushirilganida 4,29 dollar darajasida sotilayotgandi.
$TRUMP tangasi Solana (SOL) blokcheynida ishlab chiqilgan. Memkoin emblemasida Tramp kurashga chaqiriqni ifodalovchi qo‘lni ko‘targan holda tasvirlangan. Bu 2024-yil iyul oyida AQSHning sobiq prezidentiga suiqasd uyushtirilgan voqealarga ishora.
Kriptovalyuta ishga tushirilgan paytda 200 million tanga muomalaga kirgan. Biroq ishlab chiquvchilar uch yil ichida tokenlarning umumiy sonini 1 milliardga yetkazishni rejalashtirmoqda, deydi The Crypto Times portali.
Memkoinning eng mashhur namunasi Dogecoin bo‘lib, u dastlab bitkoinni parodiya qiluvchi hazil sifatida yaratilgan. Kriptovalyutaning ramzi Shibu Inu zotli it hisoblanadi.
2024-yilda memkoinlar kriptobozorning eng tez rivojlanayotgan sektoriga aylandi va yil boshidan beri ularning umumiy kapitallashuvi 1800 foizdan ziyodga o‘sdi. Tramp bir necha marta kriptovalyutalarni qo‘llab-quvvatlab kelgan.
U kriptovalyutani milliy ustuvorlik sifatida e’lon qiluvchi farmonni imzolashni rejalashtirmoqda. Farmonga barcha davlat idoralari uchun raqamli aktivlarga nisbatan siyosatni qayta ko‘rib chiqish va, ehtimol, kriptovalyutalar bilan bog‘liq barcha sud jarayonlarini to‘xtatib qo‘yish to‘g‘risidagi ko‘rsatmani kiritish masalasi muhokama qilinmoqda.
Izoh (0)