Surxondaryo viloyatining Jarqo‘rg‘on tumanida giyohvandlik vositalarining noqonuniy aylanuviga qarshi kurashish maqsadida tezkor tadbir o‘tkazildi. Bu haqda Surxondaryo viloyati bojxona boshqarmasi xabar berdi.
Ma’lum qilinishicha, fuqaro E.N. va M.A.lar ikki dona qora rangli polietilen paketga solingan o‘ziga xos o‘tkir hidli, yashil rangdagi moddalarni shartli xaridorga 112 mln so‘mga sotayotgan vaqtida ushlandi.
Ushbu moddalar ekspertizadan o‘tkazilganda sof vazni 850 gramm bo‘lgan marixuana giyohvandlik vositasi ekanligi ma’lum bo‘ldi.
Holat yuzasidan bojxona organlari tomonidan jinoyat ishi qo‘zg‘atilgan.
Ma’lumot uchun, 2024 yili viloyat bojxona boshqarmasi xodimlari tomonidan 55 ta holatda 193,33 kilogramm giyohvandlik vositalari, 438 litr sintetik giyohvandlik vositalari va 760 dona giyohvandlik tabletkalari ushlab qolingan.
Giyohvand moddalar savdosi
2024-yilning mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)