Ukraina bilan Istanbuldagi ikki tomonlama muzokaralarning maqsadi qurolli mojaroning boshlanish sabablarini bartaraf etadigan uzoq muddatli tinchlikka erishishdan iborat. Bu haqda Rossiya prezidenti maslahatchisi Vladimir Medinskiy o‘z murojaatida ma’lum qildi, deya xabar bermoqda RIA Novosti.
“Ukraina tomoni bilan to‘g‘ridan-to‘g‘ri muzokaralarning maqsadi ertami-kechmi mojaroning asosiy sabablarini bartaraf etib, uzoq muddatli tinchlikka erishishdir”, dedi u.
Medinskiy Istanbulda jurnalistlarning savollariga javob berar ekan, rossiyalik muzokarachilar “mumkin bo‘lgan kelishuvlar”ni muhokama qilishga tayyor ekanligini ta’kidladi. “Ishchi kayfiyat bor”, deb qo‘shib qo‘ydi u.
Rossiya prezidenti maslahatchisi Rossiya delegatsiyasida barcha manfaatdor idoralarning vakillari va rahbariyati borligiga e’tibor qaratdi.
“Rasmiy delegatsiyamiz prezident farmoyishi bilan tasdiqlangan. U muzokaralar olib borish uchun barcha zarur vakolat va salohiyatga ega”, dedi u.
Medinskiy, Rossiya prezidenti Putin 14-may kuni Ukraina bilan muzokaralarda qatnashadigan delegatsiyani tayyorlash jarayoniga bag‘ishlangan yig‘ilish o‘tkazganini ma’lum qildi. U yana yig‘ilishda muzokaralardagi pozitsiya belgilab olinganini qo‘shimcha qildi.
“Biz muzokaralarni 2022 yilda Ukraina tomonidan buzilgan Istanbuldagi tinchlik muzokaralarining davomi sifatida ko‘ryapmiz. Delegatsiyamiz konstruktiv ishlashga va mumkin bo‘lgan yechimlar hamda o‘zaro bog‘liqlik nuqtalarini topishga intilmoqda. Ukraina bilan to‘g‘ridan-to‘g‘ri muzokaralardan maqsadimiz inqirozning asosiy sabablarini bartaraf etish va kech bo‘lsa-da, uzoq muddatli tinchlikka erishishdir”, deya ta’kidladi Medinskiy.
14-may kuni kechqurun Rossiya prezidenti Vladimir Putin Istanbuldagi muzokaralarda ishtirok etadigan delegatsiya tarkibini e’lon qildi. Unga davlat rahbari maslahatchisi Vladimir Medinskiy boshchilik qiladi. Undan tashqari, muzokaralar guruhiga Rossiya TIV o‘rinbosari Mixail Galuzin, RF mudofaa vaziri o‘rinbosari Aleksandr Fomin va GRU boshlig‘i Igor Kostyukov kirdi. U 2022-yilda Ukraina va Rossiya delegatsiyalari uchrashganida Rossiya tomonidan muzokaralar guruhi raisi bo‘lgandi.
Rossiya prezidenti Vladimir Putin 15-may kuni Istanbulda Ukraina bilan to‘g‘ridan to‘g‘ri muzokaralarni boshlashni taklif qilgandi. Ukraina prezidenti Vladimir Zelenskiy mazkur muzokaralarda Putinni shaxsan kutishini aytdi.
Izoh (0)