Ukrainadagi urushni yakunlash bo‘yicha yozgacha jiddiy muzokaralar boshlanmasa, Ukraina mavjudligi xavf ostida qolishi mumkin. Bu haqda Ukraina razvedkasi rahbari Kirill Budanov ma’lum qildi.
Ma’lum qilinishicha, yaqinda Ukraina Oliy Radasida yopiq uchrashuv o‘tkazilgan. Parlament va fraksiyalar rahbarlari urushning haqiqiy ahvolini tushunish maqsadida Mudofaa kuchlari qo‘mondonligini taklif etgan. Bosh shtab vakillari ko‘p va biroz chalkash ma’lumotlar bergan. Biroq Kirill Budanovning javobi hammadan ko‘ra ko‘proq esda qolgan.
Kimdir undan yana qancha vaqtimiz borligini so‘radi. Kirill o‘zining sovuq tabassumi bilan ‘Agar yozgacha jiddiy muzokaralar boshlanmasa, bundan keyin Ukrainaning mavjudligi uchun juda xavfli jarayonlar yuzaga kelishi mumkin’, dedi. Hamma bir-biriga qarab, jim bo‘lib qoldi, deydi manba.
2022-yil oktyabrida Vladimir Zelenskiy Milliy xavfsizlik va mudofaa kengashining Vladimir Putin bilan muzokaralar o‘tkazish imkoniyatini istisno qiluvchi qarorini kuchga kiritdi.
2025-yil yanvarida Zelenskiy shunday farmon imzolaganini ma’lum qildi. Chunki Putin Ukrainaga ta’sir o‘tkazish maqsadida boshqa davlatlar vakillari bilan ko‘plab muzokara yo‘llarini o‘rnatishni boshlagandi. Prezidentning so‘zlariga ko‘ra, shu yo‘sin mamlakatda separatizmni to‘xtatishga erishildi.
2025-yilda Bloomberg nashriga bergan intervyusida prezident agar Ukraina urushni to‘xtatish imkoniyatiga ega bo‘lsa, Rossiya prezidenti Vladimir Putin bilan to‘g‘ridan-to‘g‘ri muzokaralarga borishi mumkinligini aytgandi. U, ayniqsa, AQSH prezidenti Donald Tramp ko‘magida tinchlikka erishishga umid qilishini va u “Ukraina uchun ortga qaytmas xavfsizlikni kafolatlay olishini” ta’kidlagan.
Kreml 2024-yil davomida Ukraina bilan tinchlik muzokaralariga tayyorligini ommaviy ravishda e’lon qildi, biroq bir qator shartlarni ilgari surdi. Masalan, 2022-yilgi Istanbul kelishuvlariga ishora, “yerdagi haqiqiy vaziyatni” yoki Putinning iyun oyidagi ultimatumini inobatag olish kabi.
19-dekabrdagi to‘g‘ridan-to‘g‘ri muloqot chog‘ida Putin Rossiya muzokaralarga tayyor ekanini yana bir bor aytdi. Ammo u tinchlik shartnomasini “faqat qonuniy hokimiyat bilan” imzolashini va prezident Vladimir Zelenskiyni bunday deb hisoblamasligini bildirdi.
♦ Ukrainaning urushni tugatish shartlari
Ukraina qo‘shinlarni 1991-yil chegaralariga olib chiqishni nazarda tutuvchi “tinchlik formulasi”ni amalga oshirishni talab qilmoqda. Gap 2014 va 2022-yillarda Rossiya tomonidan u yerda o‘tkazilgan “referendumlar” va Ukrainaning Qrim, Donetsk, Lugansk, Xerson va Zaporojye viloyatlari noqonuniy anneksiya qilingani haqida ketmoqda. Moskva “tinchlik formulasi” asosida muzokaralar olib borish imkoniyatini istisno qiladi.
♦ Rossiya shartlari
Putin o‘t ochishni to‘xtatish uchun o‘z shartlarini ilgari surdi, jumladan, Ukraina qo‘shinlari o‘zini o‘zi mustaqil deb e’lon qilingan DXR, LXR, Xerson va Zaporojye viloyatlaridan olib chiqilishi, ushbu to‘rtta hudud va Qrim go‘yoki xalqaro miqyosda Rossiyaning bir qismi sifatida tan olinishi, Ukrainaning NATOga a’zolikdan voz kechishi va sanksiyalarni olib tashlash. Zelenskiy bu taklifni “ishonib bo‘lmaydigan” ultimatum deb atadi.
Izoh (0)