Rossiyalik mashhur videobloger Guseyn Gasanov jinoiy ish bo‘yicha federal qidiruvga berildi va sirtdan hibsga olindi. Bu haqda “TASS” xabar berdi.
Tergov qo‘mitasi ma’lum qilinishicha, bloger 2019—2021-yillarda 170 million rubldan ortiq soliq to‘lamagan. Ushbu mablag‘ning 20 millionini noqonuniy ravishda legallashtirgan. Bloger xorijga qochib ketgani ta’kidlangan.
Prokuratura ma’lumotlariga ko‘ra, Guseyn Gasanov o‘yin homiylari, kurslar va sport stavkalari xaridorlaridan tushgan daromadlarni yakka tartibdagi tadbirkor sifatida emas, balki qarindoshlarining shaxsiy hisob raqamlari va jismoniy shaxs sifatida o‘z hisob raqamlari orqali o‘tkazgan. Keyin pullar yechib olinib, Gasanovga naqd pul shaklida berilgan yoki shaxsiy hisob raqamlariga o‘tkazilgan.
Natijada blogerga Rossiya Jinoyat kodeksining 174,1-moddasi 4-qismi “b” bandi (shaxs tomonidan jinoyat sodir etish natijasida qo‘lga kiritilgan katta miqdordagi pul mablag‘lari yoki boshqa mol-mulkni qonuniylashtirish (yuvish)) bo‘yicha sirtdan ayblov e’lon qilingan. Bu yetti yilgacha koloniyada jazo o‘tashni yoki 1 million rubl jarimani nazarda tutadi.
Guseyn Gasanovning munosabati
Yangiliklarni ko‘rdim. Ha, sirtdan qamoqqa olish balandparvoz gapdek eshitiladi, lekin aslida hammasi bunchalik dramatik emas. Soliq bo‘yicha barcha masalalar o‘tgan yildayoq yopilgan edi. Hozirda huquqshunoslarim vaziyat ustida ishlamoqda. Buni ko‘rib chiqamiz va nuqta qo‘yamiz.
OAVda soliqdan qochganim haqida yozishmoqda. Lekin men barcha soliqlar va 320 million rubl miqdoridagi jarimalarni to‘ladim... Kimki birovga choh qazisa, o‘zi unga tushadi, dedi Gasanov.
Gasanov — mashhur videobloger va “Millioner tafakkuri” kursi muallifi. Uning Instagram akkauntida 30,4 milliondan ortiq, YouTube kanalida esa 1,37 million kishi obunachisi bor.
Izoh (0)