Moskvaning “SSKA” klubi Rossiya Kubogi finalining javob bahsida Sankt Peterburgning “Zenit” jamoasini mag‘lub etib, superfinal yo‘llanmasiga ega chiqdi. Asosiy vaqt 2:0 natijasi bilan yakunlandi, lekin umumiy hisob 2:2 bo‘lgani sabab o‘yin penaltilar seriyasida davom ettirildi va unda “armiyachilar” 4:3 hisobida ustun keldi.
O‘yindagi hisob 37-daqiqada Matvey Kislyak tomonidan ochilgan bo‘lsa, 90+2-daqiqada Temurlan Musayev moskvaliklarning ikkinchi golini kiritdi.
Penaltilar seriyasida “SSKA”ning barcha futbolchisi aniq harakat qilgan bo‘lsa, “Zenit” safidan Mantuan Gustavo hamda Aleksandr Sobolyov nuqtada adashdi. Shu tariqa “armiyachilar” ikki o‘yindan iborat final bahsida g‘alaba qozonib, superfinal yo‘llanmasiga ega chiqdi.
O‘zbekistonlik futbolchi Abbosbek Fayzullayev 62-daqiqada zaxiradan tushirildi. U Miralem Pyanich bilan almashtirildi.
“SSKA”ning hal qiluvchi o‘yindagi raqibi bugun, 15-may kuni aniq bo‘ladi. Unda “Spartak” va “Rostov” jamoalari bahs olib boradi. Superfinal uchrashuvi esa 1-iyunga belgilangan.
Rossiya Kubogi
Final, javob bahsi
14-may, chorshanba
“SSKA” — “Zenit” 2:0 (umumiy hisob 2:2, penaltilar seriyasi 4:3)
Gollar: 1:0 — Kislyak (37), 2:0 — Musayev (90+2)
Izoh (0)