Lavrov Rossiya va Ukrainaning mart oyidagi kelishuvlari AQSH sabab buzilganini aytdi (video)

Rossiya tashqi ishlar vaziri Sergey Lavrov mart oyida Istanbulda bo‘lib o‘tgan Rossiya—Ukraina muzokaralarida tomonlar vaziyatni “hal qilish yondashuvi” bo‘yicha kelishib olishga tayyor bo‘lganini aytdi. Vazirning ta’kidlashicha, o‘shanda Kiyevning shartlari bo‘yicha sulhga erishish mumkin edi. Lavrov kelishuvlarning muvaffaqiyatsizlikka uchrashida Buyuk Britaniya va AQSHni aybladi.

Mart oyi oxirida Ukraina delegatsiyasi bilan muzokaralar stoliga o‘tirgan edik, o‘shanda Istanbulda ukrainaliklar taklif qilgan tamoyillar asosida vaziyatni hal qilish bo‘yicha yondashuv kelishib olingan va o‘sha vaziyatda bular bizga ma’qul kelgan edi, — dedi Lavrov “60 daqiqa” dasturi efirida. U Ukraina o‘shanda qanday shartlarni ilgari surganiga aniqlik kiritmadi.

Uning ishonch bilan aytishicha, muzokaralar “AQSH va Londonning bevosita buyrug‘i bilan” to‘xtatilgan. Sergey Lavrov “bu urushni Zelenskiy rejimini to‘liq nazorat qiladigan anglo-sakslar boshqarmoqda, polyaklar va Boltiqbo‘yidagilar esa ularga qo‘shilishga harakat qilmoqda” deb ta’kidladi.

TIV rahbarining so‘zlariga ko‘ra, Rossiya “muloqotga kirishish bo‘yicha jiddiy takliflar olmagan”.

Jiddiy chaqiruvlar bo‘lgani yo‘q, biz ham ularga salbiy javob bermadik, aniq takliflar ishlab chiqdik, — dedi vazir tafsilotlarga to‘xtalmasdan.

Lavrovning aytishicha, Rossiya “hech qachon muzokaralar o‘tkazishni so‘ramagan”.

Ukrainaning iltimosiga binoan muzokaralarning Istanbul raundi boshlangandi, biz ijobiy javob berdik. Bu jarayon tashabbuskorlarining o‘zi okean ortidan xitoblarini to‘xtatdi, — deb iddao qildi Rossiya TIV rahbari.

Istanbuldagi uchrashuv 29-mart kuni bo‘lib o‘tgan edi. Uning yakunlari bo‘yicha Rossiya delegatsiyasi rahbari Vladimir Medinskiy Ukraina “Rossiyaning shu yillardagi fundamental talablarni bajarishga tayyorligini e’lon qilganini” aytgan. Bu talablar orasida Ukrainaning NATOga a’zo bo‘lishdan bosh tortishi va hududiga xorijiy harbiy bazalarni joylashtirmasligi ham bor edi. Shuningdek, u Kiyev neytral va yadrosiz maqomga intilayotganini tasdiqlaganini, Rossiya esa Ukrainaning Yevropa Ittifoqiga kirishiga qarshi emasligini aytgan. Ammo Kreml muzokaralarning bu raundini “yutuq” deb hisoblamadi.

Mamlakatlarning ikki tomonlama muzokaralari Ukraina tashabbusi bilan may oyida tugatildi. Sergey Lavrovning aytishicha, G‘arb Kiyevga muzokaralarni davom ettirishni taqiqlagan. 30-sentabr kuni Ukraina prezidenti Vladimir Zelenskiy Vladimir Putin bilan muzokara qilishdan bosh tortishini ma’lum qildi. Zelenskiy, shuningdek, mamlakatning NATOga tezlashtirilgan asosda qo‘shilishi haqidagi arizani imzoladi.