AQSH prezidenti Donald Tramp Yaqin Sharqqa rasmiy safarining ikkinchi kunida Qatar amiri shayx Tamim bin Hamad Ol Soniy bilan 1,2 trillion dollarlik iqtisodiy bitim imzoladi. Tomonlar mintaqadagi vaziyatni muhokama qildi va qator kelishuvlarga erishdi. Bu haqda BBC xabar berdi.
Amir bo‘lib o‘tgan muzokaralarni “mazmunli” deb atadi. U bundan buyon Qatar va AQSH o‘rtasidagi munosabatlar yangi bosqichga ko‘tarilishiga umid bildirdi. Tramp esa suhbatdoshlar “butun dunyoni, jumladan, Rossiya, Ukraina va Eronni muhokama qilganini” aytdi.
Trampning Qatar rasmiylari bilan uchrashuvi Saudiya Arabistoniga tashrifidan ancha qisqa bo‘ldi. AQSH va Qatar tomonidan imzolangan hujjatlar orasida mudofaa sohasidagi shartnoma va ikki davlat o‘rtasidagi hamkorlik to‘g‘risidagi deklaratsiya bor.
Bundan tashqari arab davlati 200 milliard dollardan ortiq qiymatga ega 160 ta Boeing samolyoti va MQ-9B turidagi dronlar uchun “rekord darajadagi” buyurtma bergan.
Hujjatlarni imzolash marosimida AQSH mudofaa vaziri Pit Xegset, moliya vaziri Skott Bessent, savdo vaziri Govard Lyutnik va Oq uy matbuot kotibi Karolin Livitt ham ishtirok etdi. Imzolangan kelishuvlar mamlakatlar o‘rtasida kamida 1,2 trillion dollarlik iqtisodiy almashinuvni nazarda tutadi, tuzilgan bitimlar hajmi esa 243 milliard dollardan oshadi.
Qatar amiri Tamim ibn Hamad Ol Soniy muzokarani boshlashdan oldin Trampni “dunyo odami” deb atagan. Bunga javoban AQSH prezidenti amir bilan uzoq vaqtdan beri hamkorlikda ishlab kelayotganlarini aytgan.
Bizga boshqa mintaqalarda, xususan, Rossiya va Ukraina o‘rtasidagi vaziyatda ko‘p yordam berayotganingizni bilaman, degan Tramp.
Qatar hukumati Rossiyaga olib ketilgan ukrainalik bolalarni qaytarish masalasida mojaro tomonlari bilan muzokara olib bormoqda.
Trampning ta’kidlashicha, Yaqin Sharq bo‘ylab turnesining asosiy maqsadlaridan biri AQSHga Fors ko‘rfazidagi boy mamlakatlar sarmoyasini jalb qilishdir. Ammo ekspertlar uning tashrifi prezidentning o‘g‘illari Erik va kichik Donald boshchiligidagi Trump Organization tomonidan e’lon qilingan bir qator ishbilarmonlik bitimlaridan keyin sodir bo‘lganiga ham e’tibor qaratmoqda.
Xususan, kompaniya may oyi boshida e’lon qilgan Trump Organization rejalariga Qatar va BAAda golf maydonlari va hashamatli villalar qurish kiradi. Aprel oyida esa kompaniya “Dubay yuragida” 80 qavatli “jahon darajasidagi hashamatli turar joy”dan iborat mintaqadagi birinchi Trump International Hotel & Tower’ni qurmoqchi ekanini e’lon qilgan.
Hozirda prezident Trampning o‘zi oilaviy biznesga aloqador emas. AQSH prezidenti 20-yanvar kun biznesini farzandlari yuritishi haqida ma’lumot bergandi.
Izoh (0)