Ukraina prezidentining 13-mart kungi murojaatida aytishicha, Vladimir Putin Qo‘shma Shtatlar tomonidan ilgari surilgan 30 kunlik sulh taklifini rad etishga tayyorlanmoqda. Biroq buni Donald Trampga to‘g‘ridan to‘g‘ri aytishdan qo‘rqmoqda.
Vladimir Zelenskiyga ko‘ra, Putinning so‘zlari vaqtni cho‘zishga va real harakatlardan qochishga qaratilgan navbatdagi manipulyatsiyadir.
Hammamiz Putinning kutilgan va manipulyativ gaplarini eshitdik. U hozirdanoq sulh taklifini rad etishga tayyorlanmoqda. U urushni davom ettirishni va ukrainaliklarni o‘ldirishni xohlaydi, dedi u.
Zelenskiyning ta’kidlashicha, Putin bu haqda Trampga to‘g‘ridan to‘g‘ri aytishdan qo‘rqadi. Shu sabab Moskva qabul qilish imkonsiz bo‘lgan shartlarni ilgari surmoqda.
“Kreml sulh taklifini shunday shartlar bilan o‘rab olmoqdaki, bu jarayon barbod bo‘lishi yoki iloji boricha uzoq cho‘zilishi kerak. Putin bu usulni tez-tez qo‘llaydi – u ochiq yo‘q demaydi, lekin jarayonni cho‘zib, muammo hal etilishini imkonsiz qiladi. Biz bularning barchasini Rossiyaning navbatdagi manipulyatsiyasi deb bilamiz, dedi Zelenskiy.
Ukraina prezidenti, shuningdek, AQSH tomonidan ilgari surilgan sulh taklifini hech qanday shartsiz qabul qilganini ta’kidladi.
Biz Amerika tomonidan sulh rejimini joriy etish va nazorat qilish bo‘yicha tayyorlik borligini eshitdik. AQSh va Yevropaning imkoniyatlarini inobatga olsak, buni amalga oshirish mumkin. Sulh amal qilayotgan paytda uzoq muddatli xavfsizlik va doimiy tinchlik bo‘yicha barcha savollarga javob tayyorlash va urushni tugatish rejasini ishlab chiqish mumkin bo‘ladi. Ukraina bu jarayonda iloji boricha tez va konstruktiv ishlashga tayyor, deya ta’kidladi Zelenskiy.
Uning so‘zlariga ko‘ra, ushbu pozitsiya AQSH vakillariga, Yevropa hamkorlariga va barcha ittifoqchilarga yetkazilgan.
Biz jarayonni murakkablashtiradigan hech qanday shart qo‘ymayapmiz – buni Rossiya qilmoqda. Biz har doim aytganmizki, jarayonni cho‘zayotgan yagona tomon – bu Rossiya. Ularga urush kerak. Putin tinchlik yillarini o‘g‘irladi va urushni hanuz davom ettirmoqda. Endi unga bosimni kuchaytirish va natija beradigan sanksiyalar joriy qilish vaqti keldi, dedi Zelenskiy.
Ukrainada tinchlik
Ukraina urushini tugatish bo‘yicha dastlabki qadamlar Saudiya Arabistonida qo‘yildi. AQSH–Ukraina delegatsiyalari Jidda shahrida uchrashib, tinchlik shartlarini muhokama qildi. Muzokaralar davomida Vashington 30 kunlik sulh taklifini ilgari surdi. Mazkur tashabbus Kiyev va Yevropa poytaxtlari tomonidan ijobiy qabul qilindi.
Biroq Rossiya prezidentining xalqaro masalalar bo‘yicha yordamchisi Yuriy Ushakov Oq uy taklifini “Ukraina harbiylari uchun vaqtinchalik nafas olish imkoniyati” deb atab, “Moskva vaqtinchalik sulh emas, uzoq muddatli kelishuv xohlashi”ni aytdi.
Vladimir Putinning o‘zi esa “harbiy harakatlarni to‘xtatish”ga ba’zi shartlar bilan roziligini ta’kidladi.
Moskva Ukraina tomoni vaqtinchalik sulhdan safarbarlik o‘tkazish, harbiy tayyorgarlik uchun foydalanmasligi hamda ittifoqchilaridan qurol olmasligini talab qilmoqda.
Bu orada Donald Trampning maxsus vakili Stiv Vitkoff muzokara o‘tkazish uchun Moskvaga keldi. U Rossiya prezidenti bilan tinchlik shartlarini yopiq eshiklar ortida muhokama qilishi mumkin.
Izoh (0)