Украина билан Истанбулдаги икки томонлама музокараларнинг мақсади қуролли можаронинг бошланиш сабабларини бартараф этадиган узоқ муддатли тинчликка эришишдан иборат. Бу ҳақда Россия президенти маслаҳатчиси Владимир Мединский ўз мурожаатида маълум қилди, дея хабар бермоқда РИА Новости.
“Украина томони билан тўғридан-тўғри музокараларнинг мақсади эртами-кечми можаронинг асосий сабабларини бартараф этиб, узоқ муддатли тинчликка эришишдир”, деди у.
Мединский Истанбулда журналистларнинг саволларига жавоб берар экан, россиялик музокарачилар “мумкин бўлган келишувлар”ни муҳокама қилишга тайёр эканлигини таъкидлади. “Ишчи кайфият бор”, деб қўшиб қўйди у.
Россия президенти маслаҳатчиси Россия делегациясида барча манфаатдор идораларнинг вакиллари ва раҳбарияти борлигига эътибор қаратди.
“Расмий делегациямиз президент фармойиши билан тасдиқланган. У музокаралар олиб бориш учун барча зарур ваколат ва салоҳиятга эга”, деди у.
Мединский, Россия президенти Путин 14 май куни Украина билан музокараларда қатнашадиган делегацияни тайёрлаш жараёнига бағишланган йиғилиш ўтказганини маълум қилди. У яна йиғилишда музокаралардаги позиция белгилаб олинганини қўшимча қилди.
“Биз музокараларни 2022 йилда Украина томонидан бузилган Истанбулдаги тинчлик музокараларининг давоми сифатида кўряпмиз. Делегациямиз конструктив ишлашга ва мумкин бўлган ечимлар ҳамда ўзаро боғлиқлик нуқталарини топишга интилмоқда. Украина билан тўғридан-тўғри музокаралардан мақсадимиз инқирознинг асосий сабабларини бартараф этиш ва кеч бўлса-да, узоқ муддатли тинчликка эришишдир”, дея таъкидлади Мединский.
14 май куни кечқурун Россия президенти Владимир Путин Истанбулдаги музокараларда иштирок этадиган делегация таркибини эълон қилди. Унга давлат раҳбари маслаҳатчиси Владимир Мединский бошчилик қилади. Ундан ташқари, музокаралар гуруҳига Россия ТИВ ўринбосари Михаил Галузин, РФ мудофаа вазири ўринбосари Александр Фомин ва ГРУ бошлиғи Игор Костюков кирди. У 2022 йилда Украина ва Россия делегациялари учрашганида Россия томонидан музокаралар гуруҳи раиси бўлганди.
Россия президенти Владимир Путин 15 май куни Истанбулда Украина билан тўғридан тўғри музокараларни бошлашни таклиф қилганди. Украина президенти Владимир Зеленский мазкур музокараларда Путинни шахсан кутишини айтди.
Изоҳ (0)