Ijtimoiy tarmoqlarda davlat shifoxonalaridagi pulli xizmatlar 4,8 karraga qimmatlashishi haqida xabarlar tarqaldi. Iqtisodiyot va moliya vazirligi ushbu xabarlar yuzasidan izoh berdi.
Maʼlum qilinishicha, 2025-yil 27-yanvar kuni Adliya vazirligi tomonidan “Pulli tibbiy xizmat ko‘rsatadigan davolash-profilaktika muassasalarini moliyalash tartibini tasdiqlash to‘g‘risida”gi qarori ro‘yxatdan o‘tkazilgan. Qarorning 8-bandida “Tibbiy xizmatga to‘lovning eng ko‘p qiymati davolash-profilaktika muassasasi tomonidan budjet mablag‘lari hisobiga ko‘rsatilayotgan aynan shunday xizmatlar qiymatining 25 foizidan ortiq bo‘lishi mumkin emas”ligi belgilangan.
Taʼkidlanishicha mazkur qaror qabul qilinganidan so‘ng uning 8-bandidagi me‘yorning turlicha talqin qilinishi oqibatida ba‘zi tushunmovchiliklar kelib chiqqan. Jumladan, “shunday xizmatlar qiymatining 25 foizi nazarda tutilganmi yoki 125 foizimi” degan savollar yuzaga kelgan.
“Sodda qilib aytganda, “tibbiyot muassasalarida 100 ming so‘mlik tibbiy xizmat 25 ming so‘mga yoki 125 ming so‘mga ko‘rsatiladimi”, degan mazmunda murojaatlar paydo bo‘ldi.
Yuzaga kelgan tushunmovchilikni bartaraf etish maqsadida Iqtisodiyot va moliya vazirligi hamda Sog‘liqni saqlash vazirligining “Pulli tibbiy xizmat ko‘rsatadigan davolash-profilaktika muassasalarini moliyalash tartibi 8-bandiga o‘zgartirish kiritish haqida” qo‘shma qarori qabul qilinib, Adliya vazirligi tomonidan 2025-yilning 7-may kuni ro‘yxatdan o‘tkazildi”, deyiladi xabarda.
Qayd etilishicha, bu orqali tartib amaldagi normativ hujjatga muvofiqlashtirildi hamda pulli tibbiy xizmatlar narxlarining yuqori chegarasi aniq belgilandi. Xususan, aholiga pulli asosda ko‘rsatilgan tibbiy xizmat narxini belgilashda tegishli xizmat tannarxiga 20 foizgacha ustama qo‘llash mumkinligi qat‘iy belgilandi.
Ya‘ni, endilikda tannarxi 100 ming so‘m bo‘lgan tibbiy xizmatning pulli xizmat narxi 120 ming so‘mdan ortiq bo‘lishi mumkin emasligi qayd etildi.
“Shu kungacha esa tibbiyot muassasalarida aholiga pulli asosda ko‘rsatiladigan tibbiy xizmat narxini shakllantirish uning tannarxiga 25 foizgacha ustama qo‘llash orqali amalga oshirilgan. Ya’ni tannarxi 100 ming so‘m bo‘lgan tibbiy xizmatning pulli narxini 125 ming so‘mgacha belgilash mumkin bo‘lgan.
Lekin ijtimoiy tarmoqlarda mazkur yangilik “davlat shifoxonalaridagi pulli xizmatlar qimmatlashadi”, deb noto‘g‘ri talqin qilinmoqda. Aslida Adliya vazirligi tomonidan 2025-yilning 7-may kuni ro‘yxatdan o‘tkazilgan qaror bilan tibbiyot muassasalari tomonidan ko‘rsatiladigan pulli xizmat narxi kamaytirildi. Ya‘ni, davlat shifoxonalaridagi pulli xizmatlar uchun to‘lovlar kamida 5 foiz arzonlashdi”, deya qo‘shimcha qilingan xabarda.
Izoh (0)