Hindistonda o‘zini britaniyalik shifokor sifatida tanishtirib, yurak operatsiyalarini o‘tkazgan va yetti bemorning o‘limiga sabab bo‘lgan shaxs hibsga olindi. Bu haqda BBC xabar berdi.
Soxta shifokor Narendra Vikramaditya Yadav bo‘lib, u o‘zini Dr. N John Kamm deb tanishtirgan. U Madhya Pradesh shtatidagi xristian shifoxonasida kardiolog sifatida ishlagan. Politsiya uni firibgarlik va hujjatni soxtalashtirishda ayblamoqda.
7-aprel kuni hibsga olinishidan bir necha soat avval, Yadav o‘ziga tuhmat qilganlikda ayblab, nashriyotlarga 50 million rupiylik (taxminan 580 ming dollar) da’vo arizasini yuborgan. U ishlagan Damoh shahridagi shifoxona Yadavning soxta diplomlaridan bexabar bo‘lgan.
Hech kim uning soxta shifokor ekanidan shubhalanmagan. U o‘zini professor sifatida tutardi, degan shifoxona rasmiysi.
Mazkur ish fevral oyida, Damoh bolalar huquqlari qo‘mitasi bir necha bemor o‘limini kuzatgach ochilgan. Yadav bu orada ishdan bo‘shab, bedarak ketgan.
Yadavning shaxsiga oid shubhalar ilk bor 2019-yilda paydo bo‘lgan. U Britaniyada professor Jon Kamm qo‘l ostida o‘qiganini, 2002-yilda St George’s kasalxonasida faoliyat yuritganini aytgan. Keyinchalik AQSH, Germaniya va Ispaniyada ham ishlaganini ijtimoiy tarmoqlarda yozgan.
2023-yilda u Prof N John Kamm nomi ostida X (sobiq Twitter)da o‘z sahifasini ochgach. Haqiqiy professor Jon Kamm bu sahifa soxta ekanini bildirgan.
Yadav 2019-yilda ham britaniyalik shifokorni o‘g‘irlashda gumon qilinib hibsga olingan, 2014-yilda esa kasbiy etika qoidalarini buzganlik uchun 5 yil faoliyatidan chetlatilgan. 2013-yilda Uttar Pradeshda unga nisbatan firibgarlik ayblovi bilan ish qo‘zg‘atilgan, biroq keyin bu ish sud qarori bilan to‘xtatilgan.
Izoh (0)