O‘zbekistondagi gaz zapravkalarining ish vaqtiga cheklov o‘rnatildi

Energetika vazirligi respublika avtomobillarga gaz to‘ldirish kompressor shoxobchalarida cheklovlar joriy qilinishini ma’lum qildi.

“Bundan maqsad – birinchi navbatda tabiiy gaz yetkazib berilishi muhim hisoblangan aholi, shifoxona, maktab hamda maktabgacha ta’lim tashkiloti kabi ahamiyatga ega muassasalar, shuningdek, elektr energiyasi ishlab chiqaruvchi yirik stansiyalarning tabiiy gaz ta’minotida barqarorligini ta’minlashdan iborat.

Hurmatli iste’molchilar, vaktinchalik cheklov choralari havo harorati biroz ko‘tarilgunga qadar davom etadi hamda AGTKSh tez orada avvalgi tartibda ishlash rejimiga o‘tishini ma’lum qilamiz”, – deyiladi vazirlik xabarida.

Xususan, Farg‘onada 17-noyabrdan boshlab viloyat hududidagi avtomobillarga gaz to‘ldirish shoxobchalariga tabiiy gaz yetkazib berish har kuni soat 18:00 dan soat 06:00 ga qadar to‘xtatiladi. Bu haqda “Hududgaz Farg‘ona” gaz ta’minoti filiali direktori Ulug‘bek Qo‘chqorov Telegram sahifasida ma’lum qilgan.

Filial rahbarining qayd etishicha, qish mavsumida tabiiy gazni yetkazib berishda texnologik rejim jarayonlaridagi gaz bilan bog‘liq ishlar bajarilishi munosabati bilan, viloyatga keluvchi tabiiy gaz bosimida pasayish kuzatilmoqda.

Shuningdek, mazkur qaror havoning keskin sovub ketgani sabab birinchi navbatda aholi va ijtimoiy soha obyektlarini uzluksiz gaz bilan ta’minlash maqsadida qabul qilingan.

“Yuqoridagilardan kelib chiqib, avtomobillarga gaz to‘ldirish shoxobchalariga tabiiy gazni yetkazib berish 17-noyabrdan tong soat 06:00 dan soat 18:00 ga qadar belgilandi. Viloyatimizdagi haydovchilardan o‘z avtoulovlariga gaz to‘ldirishda har kunlik belgilangan vaqt (06:00 – 18:00) oralig‘ida gaz to‘ldirish ishlarini texnika xavfsizlik qoidalari asosida amalga oshirishlarini so‘raymiz”, — deyiladi “Hududgaz Farg‘ona” gaz ta’minoti filiali rahbarining axborotida.

“Daryo” muxbirining ma’lum qilishicha, so‘nggi kunlarda viloyatdagi metan zapravkalar oldida navbatlar yuzaga kelishni boshlagan. Ayrim avtomobillarga gaz to‘ldirish shoxobchalari esa vaqtincha faoliyatini to‘xtatgan.

Shuningdek, “O‘ztransgaz” AJning “Gazeta.uz”ga ma’lum qilishicha, Jizzax viloyatidagi 68 ta gaz quyish shoxobchasida soat 17:00 dan 23:00 gacha gaz ta’minoti to‘xtatiladi. Ushbu jadval havo harorati keskin pasayganda kuchga kiradi.

Metan zapravkalarga cheklangan vaqt davomida gaz yetkazib berish tartibi qachongacha davom etishi ma’lum qilinmagan.