Farg‘onada daraxt kesgan fuqaro 45 mln so‘m tovon to‘lab, 100 tup daraxt ekadi. Bu haqda Ekologiya, atrof-muhitni muhofaza qilish va iqlim o‘zgarishi vazirligi matbuot xizmati xabar berdi.
Maʼlum qilinishicha, Farg‘ona viloyati Ekologiya boshqarmasi Marg‘ilon shahar bo‘limiga shahar bolalar shifoxonasi hududida daraxtlar kesilayotganligi haqida murojaat kelib tushgan. Murojaat o‘rganilganida shifoxona hududida texnik xodim M.I. tomonidan bir tup o‘rmon fondiga kirmaydigan ko‘p yillik archa daraxti hech qanday ruxsatnomasiz kesilganligi aniqlangan.
18-mart kuni shahar ekologiya bo‘limi davlat inspektorlari tomonidan daraxtlarni kesmaslik to‘g‘risida ogohlantirish xati berilgan. Ammo xodim bunga amal qilmagan.
Daraxt kesilishi natijasida tabiatga 36,5 mln so‘m zarar yetkazilgan. Shuningdek, huquqbuzarga nisbatan MJtKning 79-moddasi 1-qismiga (daraxtlarni, butalarni, boshqa o‘simliklarni va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazish) asosan maʼmuriy bayonnoma rasmiylashtirilib, BHMning 25 baravari — 8,5 mln so‘m miqdorida jarima belgilandi.
M.I. qilmishi uchun jami 45 mln so‘m to‘laydigan bo‘ldi. Shuningdek, huquqbuzarga 100 tup daraxt ko‘chatini kompensatsiya tarzida ekish hamda ularni kamida 3 yil parvarish qilish majburiyati yuklatildi.
Izoh (0)