Ижтимоий тармоқларда давлат шифохоналаридаги пулли хизматлар 4,8 каррага қимматлашиши ҳақида хабарлар тарқалди. Иқтисодиёт ва молия вазирлиги ушбу хабарлар юзасидан изоҳ берди.
Маълум қилинишича, 2025 йил 27 январь куни Адлия вазирлиги томонидан “Пулли тиббий хизмат кўрсатадиган даволаш-профилактика муассасаларини молиялаш тартибини тасдиқлаш тўғрисида”ги қарори рўйхатдан ўтказилган. Қарорнинг 8-бандида “Тиббий хизматга тўловнинг энг кўп қиймати даволаш-профилактика муассасаси томонидан бюджет маблағлари ҳисобига кўрсатилаётган айнан шундай хизматлар қийматининг 25 фоизидан ортиқ бўлиши мумкин эмас”лиги белгиланган.
Таъкидланишича мазкур қарор қабул қилинганидан сўнг унинг 8-бандидаги меъёрнинг турлича талқин қилиниши оқибатида баъзи тушунмовчиликлар келиб чиққан. Жумладан, “шундай хизматлар қийматининг 25 фоизи назарда тутилганми ёки 125 фоизими” деган саволлар юзага келган.
“Содда қилиб айтганда, “тиббиёт муассасаларида 100 минг сўмлик тиббий хизмат 25 минг сўмга ёки 125 минг сўмга кўрсатиладими”, деган мазмунда мурожаатлар пайдо бўлди.
Юзага келган тушунмовчиликни бартараф этиш мақсадида Иқтисодиёт ва молия вазирлиги ҳамда Соғлиқни сақлаш вазирлигининг “Пулли тиббий хизмат кўрсатадиган даволаш-профилактика муассасаларини молиялаш тартиби 8-бандига ўзгартириш киритиш ҳақида” қўшма қарори қабул қилиниб, Адлия вазирлиги томонидан 2025 йилнинг 7 май куни рўйхатдан ўтказилди”, дейилади хабарда.
Қайд этилишича, бу орқали тартиб амалдаги норматив ҳужжатга мувофиқлаштирилди ҳамда пулли тиббий хизматлар нархларининг юқори чегараси аниқ белгиланди. Хусусан, аҳолига пулли асосда кўрсатилган тиббий хизмат нархини белгилашда тегишли хизмат таннархига 20 фоизгача устама қўллаш мумкинлиги қатъий белгиланди.
Яъни, эндиликда таннархи 100 минг сўм бўлган тиббий хизматнинг пулли хизмат нархи 120 минг сўмдан ортиқ бўлиши мумкин эмаслиги қайд этилди.
“Шу кунгача эса тиббиёт муассасаларида аҳолига пулли асосда кўрсатиладиган тиббий хизмат нархини шакллантириш унинг таннархига 25 фоизгача устама қўллаш орқали амалга оширилган. Яъни таннархи 100 минг сўм бўлган тиббий хизматнинг пулли нархини 125 минг сўмгача белгилаш мумкин бўлган.
Лекин ижтимоий тармоқларда мазкур янгилик “давлат шифохоналаридаги пулли хизматлар қимматлашади”, деб нотўғри талқин қилинмоқда. Аслида Адлия вазирлиги томонидан 2025 йилнинг 7 май куни рўйхатдан ўтказилган қарор билан тиббиёт муассасалари томонидан кўрсатиладиган пулли хизмат нархи камайтирилди. Яъни, давлат шифохоналаридаги пулли хизматлар учун тўловлар камида 5 фоиз арзонлашди”, дея қўшимча қилинган хабарда.
Изоҳ (0)