Jenevada Amerika delegatsiyasi AQSH Ukrainada kam ta’minlangan fuqarolar va ruhiy shifoxona bemorlari ustida biologik tadqiqotlar o‘tkazganini tan oldi. Bu haqda Rossiya Qurolli kuchlari radiatsiyaviy, kimyoviy va biologik himoya qo‘shinlari boshlig‘i general-leytenant Igor Kirillov ma’lum qildi, deb yozadi “RBK”.
Rossiya Mudofaa vazirligi xabariga ko‘ra, 5—9-sentabr kunlari Jenevada Biologik va zaharli qurolni taqiqlash to‘g‘risidagi konvensiyaga a’zo mamlakatlar yig‘ilishi bo‘lib o‘tgan. Tadbir Moskva tashabbusi bilan o‘tkazilgan bo‘lib, uning fikricha, AQSH va Ukraina hujjat nizomlarini buzgan.
Maxsus operatsiyalar boshlanganidan buyon Rossiya hukumati AQSH Ukrainada biologik qurol ishlab chiqish bilan shug‘ullanganiga oid dalillar topganini bir necha marta ma’lum qilgandi. Shu munosabat bilan sentabr boshidagi yig‘ilishda Rossiya vakillari Vashington va Kiyev vakillariga 20 dan ortiq savollar berdi, ular orasida ukrainalik harbiylar va ruhiy xastalar ustida yuqumli kasalliklar qo‘zg‘atuvchilari va zaharli moddalar ishtirokida qanday tadqiqotlar o‘tkazilgani haqidagi savollar ham bor edi.
Amerika va Ukraina tomonlarining ukrainalik fuqarolar shtammlari va biomateriallari olib ketilishi hamda harbiy xizmatchilar, kam ta’minlangan fuqarolar va “aholining eng kam himoya qilingan toifasi — psixiatriya kasalxonalari bemorlari” ustida tadqiqotlar o‘tkazish chog‘ida axloq me’yorlariga rioya etilishi yuzasidan izohlari “hech ham ishonarli tuyulmadi”, dedi Kirillov.
“Amerika delegatsiyasi bunday faktlarni tan oldi va patogen biomateriallar namunalari AQSHga unchalik tez-tez olib ketilmaganini qayd etdi. Xorijga yuborilayotgan bionamunalar hajmi va davriyligini baholash imkonini bermaydigan ushbu izohdan tashqari, majlis ishtirokchilari boshqa hech qanday tushuntirishlar bergani yo‘q”, — dedi Rossiya Mudofaa vazirligi vakili.
Ukrainada Pentagon buyurtmasiga ko‘ra ishlagan biologik laboratoriyalar tarmog‘i haqida Kirillov mart oyida, Rossiya maxsus operatsiyasi boshlanganidan keyin ma’lum qilgandi. U gap xavfli mikroorganizmlar shtammlari to‘planib, AQSHga yuborilishi va bioqurol potensial agentlari o‘rganilishi haqida borayotganini da’vo qilgandi. Federatsiya kengashi laboratoriya faoliyati yuzasidan surishtiruv o‘tkazishga qaror qildi, Rossiya Tergov qo‘mitasi esa ommaviy qirg‘in quroli ishlab chiqish haqidagi modda bo‘yicha jinoyat ishi ochdi. Muassasa rahbari Aleksandr Bastrikin da’vo qilishicha, Amerika Ukrainadagi biodasturlarni moliyalashtirishga 2005-yildan buyon 224 million dollar sarflagan.
AQSHdan Ukrainadagi biologik faoliyatini fosh qilishni Xitoy ham talab qilib chiqqandi. Davlat departamenti va Pentagon biologik qurol ishlab chiqilishiga aloqadorligini rad etgan, Ukraina prezidenti Vladimir Zelenskiy esa Ukrainada hech qachon ommaviy qirg‘in quroli ishlab chiqilmaganini ma’lum qilgan edi. BMT esa Rossiyaning Ukrainada harbiy biologik dasturlar borligi haqidagi ma’lumotini tekshirish bo‘yicha mandat va texnik imkoniyatlarga ega emasligini aytib o‘tgandi.
Izoh (0)