Moldova Respublikasining poytaxtida joylashgan “Kishinyov-Arena” sport majmuasida “Oloviddin va ming bir kecha ertaklari” muz shousi paytida noxush hodisa sodir bo‘ldi.
Ma’lum qilinishicha, akrobatik harakat vaqtida ikki nafar ijrochi — yigit va qiz arqonlar yordamida sahna shiftiga ko‘tarila boshlagan, biroq bir lahzada qiz taxminan uch metr balandlikdan muz ustiga yiqilgan.
Sodir bo‘lgan voqea ijtimoiy tarmoqlarda tarqalgan videoga tushib qolgan. Yiqilgandan so‘ng raqqosa qimirlamay yotganini ko‘rish mumkin. Voqea joyiga tez tibbiy yordam yetib kelib, jabrlanuvchini kasalxonaga olib ketgan. Tomosha esa davom etgan.
Suhih Production kompaniyasi o‘zining Facebook sahifasida qizning oyoqlari singanini va lat yeganini, u tez yordam shifoxonasida shifokorlar nazorati ostida ekanligini ma’lum qilgan.
“Bugungi kunda muz shousi raqqosasi bilan sodir bo‘lgan va taxminan uch metr balandlikdan yiqilish bilan yakunlangan hodisa bo‘yicha bizga ma’lum bo‘lishicha, voqea joyida darhol jihozlar tekshirilgan va ular to‘liq soz hamda ishchi holatda bo‘lgan. Videokameralardan olingan tasvirlar batafsil o‘rganilgandan so‘ng, raqqosa qo‘l kaftini tegishli tarzda mahkamlamagani va bu fojiali oqibatlarga olib kelgani ma’lum bo‘ldi.
Hozirgi vaqtda biz shou tashkilotchisi va prodyuseri sifatida qizning ahvolini kuzatib, shifoxona tibbiyot xodimlari bilan aloqada bo‘lib turibmiz.
Raqqosa nima sababdan xavfsizlik qoidalariga rioya qilmagani noma’lum. Ushbu voqea bugun tomoshada sodir bo‘lganidan chin dildan afsusdamiz”, deyiladi Suhih Production bayonotida.
Izoh (0)