Germaniya yarimo‘tkazgichlarni tayyorlash va ishlab chiqarishga 2 milliard yevro sarmoya kiritmoqchi.
Bu haqda Bloomberg manbalarga tayanib yozmoqda.
Ularning so‘zlariga ko‘ra, Germaniya hukumati ushbu mablag‘larni yarimo‘tkazgichlar, ular uchun butlovchi qismlar va boshqa mahsulotlar ishlab chiqarish bilan bog‘liq 10–15 loyiha o‘rtasida taqsimlamoqchi.
Germaniya Iqtisodiyot vazirligi matbuot kotibi Annika Eynxorn chip ishlab chiqaruvchilarga sanoatning “hozirgi rivojlanish darajasidan sezilarli yuqori bo‘lgan zamonaviy ishlab chiqarish quvvatlarini” rivojlantirish uchun mablag‘ ajratish rejalashtirilayotganini tasdiqladi. Biroq u tafsilotlarni keltirmadi.
O‘tgan yili Germaniya yarimo‘tkazgichlar ishlab chiqarish sanoatini rivojlantirishga 20 milliard yevro sarmoya kiritishni rejalashtirayotgani haqida ma’lum bo‘lgandi. Biroq hozirda og‘ir kunlarni boshdan kechirayotgan Intel ushbu korxona qurilishini keyinga qoldirgan.
Avvalroq Ilon Maskning neyrochiplar ishlab chiqaruvchi Neuralink kompaniyasi Kanada regulyatorlaridan mamlakatda o‘z qurilmasining klinik sinovlarini boshlash uchun ruxsat olgani xabar qilingandi.
Sinov jarayoni Torontodagi University Health Network (UHN) shifoxonalaridan birida bo‘lib o‘tadi.
“Biz neyroxirurgiya sohasidagi ushbu ilmiy yangilikning yetakchi safida turganimizdan juda faxrlanamiz”, dedi shifoxona rahbari Kevin Smit.
Mask kompaniyasi AQSHda bir necha bemorlarga miya implantlarini o‘rnatgan edi. Kompaniyaning ilk bemori — sakkiz yil avval yelkasidan past qismi shol bo‘lgan 29 yoshli Nolan Arboga ko‘ra, qurilma tufayli u kompyuterdan foydalanish va hatto video o‘yinlar o‘ynashga qodir bo‘ldi. Erkakning so‘zlariga ko‘ra, chipni implantatsiya qilish unga hayot sifatini yaxshilash, “dunyo bilan qayta bog‘lanish”, ijtimoiy aloqalarni tiklash, erkin bo‘lish va maqsadlarga erishish imkonini bergan.
Izoh (0)