Qozog‘istonda ayrim shaxslar uchun ChatGPT sun’iy intellekt tizimidan foydalanishi taqiqlandi. Bu haqda Raqamli rivojlanish, innovatsiyalar va aerokosmik sanoat vaziri o‘rinbosari Qanish To‘leushin ma’lum qilgan.
To‘leushinning aytishicha, Raqamlashtirish vaziri davlat xizmatchilariga ChatGPT’dan xizmat maqsadlarida foydalanishni taqiqlovchi buyruqni imzolagan.
Ta’kidlanishicha, ushbu chora ma’lumotlar sizib chiqishining oldini olish uchun zarur. Davlat xizmatchilariga muqobil sifatida Nazarboyev universiteti negizida ishlab chiqilgan mahalliy sun’iy intellekt tizimi taklif etilgan.
“Kimki ish samaradorligini oshirish uchun til modelidan foydalanmoqchi bo‘lsa, olimlarimiz tomonidan ishlab chiqilgan muqobil yechimdan foydalanishi mumkin. Bizning katta til modelimiz serverlarimizda yopiq tizimda joylashgan”, deya izoh bergan Qanish To‘leushin.
Shu bilan birga, u hozirda u yoki bu ish aynan qaysi sun’iy intellekt tizimi orqali bajarilganini tekshirishning iloji yo‘qligini tan olgan. Muqobil, mahalliy sun’iy intellekt tizimining yaratilishi Qozog‘iston ichida “kompetensiyalarni rivojlantirish” uchun zarur deb hisoblanmoqda.
Izoh (0)