Қозоғистонда айрим шахслар учун ChatGPT сунъий интеллект тизимидан фойдаланиши тақиқланди. Бу ҳақда Рақамли ривожланиш, инновациялар ва аэрокосмик саноат вазири ўринбосари Қаниш Тўлеушин маълум қилган.
Тўлеушиннинг айтишича, Рақамлаштириш вазири давлат хизматчиларига ChatGPT’дан хизмат мақсадларида фойдаланишни тақиқловчи буйруқни имзолаган.
Таъкидланишича, ушбу чора маълумотлар сизиб чиқишининг олдини олиш учун зарур. Давлат хизматчиларига муқобил сифатида Назарбоев университети негизида ишлаб чиқилган маҳаллий сунъий интеллект тизими таклиф этилган.
“Кимки иш самарадорлигини ошириш учун тил моделидан фойдаланмоқчи бўлса, олимларимиз томонидан ишлаб чиқилган муқобил ечимдан фойдаланиши мумкин. Бизнинг катта тил моделимиз серверларимизда ёпиқ тизимда жойлашган”, дея изоҳ берган Қаниш Тўлеушин.
Шу билан бирга, у ҳозирда у ёки бу иш айнан қайси сунъий интеллект тизими орқали бажарилганини текширишнинг иложи йўқлигини тан олган. Муқобил, маҳаллий сунъий интеллект тизимининг яратилиши Қозоғистон ичида “компетенсияларни ривожлантириш” учун зарур деб ҳисобланмоқда.
Изоҳ (0)