Sudan 6-may kuni Birlashgan Arab Amirliklari bilan diplomatik aloqalarini uzdi va Abu Dabidagi elchixona xodimlarini ortga chaqirib oldi. Bu haqda Anadolu xabar berdi.
Sudan Xavfsizlik va mudofaa kengashi o‘z bayonotida BAAni “tajovuzkor davlat” deb atadi va amirlikni harbiylashtirilgan “Tezkor yordam kuchlari”ni qo‘llab-quvvatlashda aybladi.
Butun dunyo ikki yildan ortiq vaqt davomida BAA tomonidan Sudanning suvereniteti, hududiy yaxlitligi va fuqarolarining xavfsizligiga tajovuz qilishiga guvoh bo‘lib keldi, deyiladi kengash bayonotida.
Sudan amirliklarni G‘arbiy Dafur viloyatidagi genotsidga aloqadorlikda ayblab, uni Xalqaro sudga bergan edi. Ammo sud ham, BAA ham bu da’voni rad etgan.
“Tezkor yordam kuchlari” ilgari Sudan hukumati tomonidan boshqarilgan harbiylashtirilgan xunta. U 2023-yili isyonchi guruhga aylangan. 2025-yil 15-aprelda esa mazkur xunta Sudan nazorati ostidagi ba’zi hududlarini boshqarish uchun parallel “Tinchlik va birdamlik hukumati” tuzilishini e’lon qilgan.
Izoh (0)