Las-Vegasdagi Tramp mehmonxonasi yonida 1-yanvar kuni Cybertruck portlatildi. Avtomobil haydovchisi buni amalga oshirish uchun ChatGPT’dan foydalangani aytilmoqda. Bu haqda Las-Vegas politsiyasi vakili Kevin Makmaxill ma’lum qildi.
Politsiya ma’lumotlariga ko‘ra, portlashdan sal oldin gumonlanuvchi ChatGPT’dan bomba qismlarini qayerdan sotib olish, uni qanday yig‘ish va ishga tushirish to‘g‘risida ma’lumot so‘ragan. Bundan tashqari 37 yoshli Mettyu L. Arizona shtatida mushakbozlikdan foydalanishning huquqiy holatini aniqlashga uringan.
Tesla kompaniyasi elektromobilining portlashi AQSH hududida portlovchi qurilma yaratish uchun ChatGPT’dan foydalanilgan birinchi hodisa bo‘ldi, deydi Las-Vegas politsiyasi.
Bu ma’lumotlar sun’iy intellektga qarshi tanqidni kuchaytirishi mumkin.
OpenAI: ChatGPT faqat tarmoqda mavjud ma’lumotlarni bergan
ChatGPT’ni yaratgan OpenAI kompaniyasi politsiyaning bayonotiga izoh berdi. Unga ko‘ra, chat-bot “zararli yoki noqonuniy xatti-harakatlar haqida ogohlantirib, internetda mavjud bo‘lgan ma’lumotlarni taqdim etgan”. OpenAI “sun’iy intellekt vositalaridan mas’uliyat bilan foydalanishga intilishlari” va uning texnologiyalari “zararli ko‘rsatmalardan voz kechish uchun ishlab chiqilganini” ta‘kidladi.
Tramp mehmonxonasi oldida portlash
AQSHning saylangan prezidenti Donald Trampga tegishli mehmonxonaga kiraverishda q-yanvar kuni mushaklar ortilgan ijaraga olingan elektr pikap portladi. Oqibatda yetti kishi jarohat olgandi. Mashina portlashidan oldin erkak boshiga o‘q uzgan.
Tergovchilar ma’lumotiga ko‘ra, askar Trampdan nafratlanmagan. Amerikaning The Daily Beast nashri yuqori lavozimli amaldorga tayanib xabar berishicha, marhum askar Trampning tarafdori bo‘lgani va noyabr oyida unga ovoz bergan. Harbiy xizmatchining amakisi uning jiyani “o‘z mamlakatini sevgani, Trampni yaxshi ko‘rgani va har doim juda vatanparvar askar bo‘lgani”ni aytgan.
Izoh (0)