Qozog‘iston Milliy iqtisodiyot vaziri o‘rinbosari Arman Kasenov mamlakatda atom elektr stansiyasi muddatli to‘lov evaziga qurilishi mumkinligini aytdi. Bu haqda “Nur.kz” xabar berdi.
Kasenov Senat yig‘ilishi chog‘ida AES qurilishi uchun qancha mablag‘ talab etilishi mumkinligi haqida fikr bildirgan. Jurnalistlar tegishli masalani ko‘targan.
“Hozircha kim va qaysi davlat qurishiga qaror qilinmagan. Shu bois, qanday moliyalashtirilishi ham noma’lum. AES qurilishini moliyalashtirish variantlaridan biri muddatli to‘lov ekanini bilaman”, dedi Kasenov.
U AESni quradigan kompaniya to‘lov muddatini kechiktirishi mumkin bo‘lgan variant ko‘rib chiqilayotganini aytdi.
“Shunga ko‘ra, uni moliyalashtirish uchun mablag‘ kerak bo‘lmasligi ham mumkin. Biroq hozir buni aniq ayta olmaymiz, chunki hatto kim qurishini ham bilmaymiz... Barcha energiya ishlab chiqarish loyihalari xarajatli bo‘ladi. Bu xarajatlar xizmat ko‘rsatish tarifiga kiritiladi”, deya qo‘shimcha qildi vazir o‘rinbosari.
Balxash ko‘li bo‘yida qurilishi rejalashtirilgan AES qiymati dastlab 10-15 milliard dollarga baholanayotgandi. Biroq qurilish yakuniga qadar u 50 foizga qimmatlashishi mumkin. Stansiyani qurishda ishtirok etishi mumkin bo‘lgan kompaniyalar orasida Qozog‘iston hukumati “Rosatom” (Rossiya), KHNP (Janubiy Koreya), EDF (Fransiya) va China National Nuclear Corporation’ni (Xitoy) bor.
6-oktyabr kuni Qozog‘istonda atom elektr stansiyasi qurilishi bo‘yicha referendum o‘tkazildi. Referendumda qatnashgan fuqarolarning 71,12 foizi yoqlab, 28,88 foizi qarshi ovoz bergan. AES bo‘yicha umumxalq referendumida saylovchilarning 63,66 foizi – 7 million 820 ming 204 kishi ishtirok etgan.
Izoh (0)