Apple kompaniyasi sun’iy intellektni qo‘llab-quvvatlovchi iOS 18.1 yangilanishini taqdim etdi. U qanday afzalliklarga ega ekanini quyida ko‘rib chiqamiz.
Asosiy yangiliklar Apple Intelligence sun’iy intellekt tizimidan tashqari Writing Tools, Reduce Interruptions va “Foto” ilovasida tahrirlash vositalari kabi funksiyalarni o‘z ichiga oladi. Biroq SIni qo‘llav-quvvatlovchi yangilanishlar iPhone 15 Pro, Pro Max va iPhone 16 seriyasidagina mavjud. Shunga qaramasdan, Apple foydalanuvchilar uchun foydali boshqa funksiyalarni taqdim etmoqda.
Matn bilan ishlash vositalari endi har qanday ilovada matnni tahrirlash va optimallashtirish imkonini beradi, Reduce Interruptions funksiyasi esa foydalanuvchi smartfonga kamroq chalg‘ishi uchun bildirishnomalarni ustuvorlikka qarab tartiblaydi. “Foto” ilovasida rasmlardagi ortiqcha obyektlarni olib tashlash mumkin.
Siri ovozli yordamchisi endi kontekstga oid pauza va so‘rovlardagi o‘zgarishlarni tushuna oladi, pochta dasturida esa “Ustuvor xabarlar” va “Aqlli javoblar” funksiyalari paydo bo‘ldi. Bundan tashqari, telefon qo‘ng‘iroqlarini yozib olish funksiyasi qo‘shildi.
Shu bilan birga, ayrim mamlakatlarda Apple tashqi dasturchilar uchun NFC qo‘llab-quvvatlashni joriy etdi. Bu esa turli ilovalar orqali uchinchi tomon to‘lovlarini amalga oshirish, smartfonga NFC-belgilarini kiritish va boshqa imkoniyatlarni yaratadi.
Yangilanish hajmi 1,8 Gbayt, ammo Apple Intelligence funksiyalari uchun kamida 4 Gbayt bo‘sh joy kerak. XS’dan boshlab barcha iPhone egalari iOS 18.1 o‘rnatishi mumkin. ChatGPT bilan integratsiya va tasvir generatori kabi boshqa funksiyalar iOS 18.2 yangilanishida paydo bo‘ladi.
Izoh (0)