Bugun ijtimoiy tarmoqlarda aynan shu mazmundagi savollar ko‘p va xo‘p yangradi. Har kim o‘zicha talqin qildi. Kimdir “u” desa, boshqa birov “bu sabab” dedi. Xullas, talqin turlicha, biroq masʼullar buni “fuqarolarga yanada qulaylik yaratish”, deb nomladi.
Gap nimada?
Aslida hammasi Ichki ishlar vazirligining Jamoat xavfsizligi departamenti, Yo‘l harakati xavfsizligi axborot xizmati rahbari Zoyir Yo‘ldoshevning bayonotidan boshlandi.
U Telegram kanalida rasmiy xabar eʼlon qilar ekan, ayni kunga qadar binoyidek ishlab turgan ilovada maʼlumotlar ulashish to‘xtatilganini yozdi. “Shu bois qo‘l telefoningizdagi ‘Ap Store’ yoki ‘Play market’ orqali davlat Yo‘l harakati xavfsizligi xizmatining ‘Safe Road YHXX’ ilovasini yuklab, ro‘yxatdan o‘tib olishingiz mumkinligini maʼlum qilamiz”, dedi.
Demak rasmiy chiqishdan maʼlum bo‘ladiki, davlat Yo‘l harakati xavfsizligi ayni kunga qadar haydovchilarga asosan jarimalar haqida maʼlumot beruvchi Road24’dan voz kechdi va o‘zimizniki deyilayotgan Safe Road’ni tavsiya qilmoqda.
Buni jamoatchilik qanday kutib oldi?
“Bu yangi hokim kelib hamma o‘rgangan bozorni buzishiga o‘xshaydi” — Otabek Bakirov
Iqtisodchi bloger Otabek Bakirov bu o‘zgarishni hududga kelgan yangi hokimning hamma o‘rgangan bozorni buzishiga o‘xshatdi.
Yo‘l harakati xavfsizligi xizmati tomonidan Safe Road ilovasi tavsiya va targ‘ib qilinmoqda. Hamma o‘rgangan Road24 endi ishlamasmish. Road24 va YHXX o‘rtasidagi yo‘l harakati qoidalarini buzganlik uchun belgilangan jarimalar to‘g‘risida maʼlumot almashinuvi batamom to‘xtalipti. Bu xuddi yangi va quling o‘rgulsin zamonda hokimlar tayinlanishi bilan tadbirkor-u, aholi o‘rgangan eski bozorni buzdirib, yangisini qurdirish va yoqadimi, yo‘qmi, ixtiyoran-majburan ko‘chirishga o‘xshaydi, deydi bloger.
Jurnalist Muhrim Aʼzamxo‘jayev ushbu holatga eʼtibor qaratar ekan YHXXdagi davlat xizmatchilarini yo‘q joydan muammo yasaydiganlar deb atadi.
O‘zbekistonda yo‘l harakati xavfsizligini taʼminlash uchun qilinishi kerak bo‘lgan minglarcha ish bor. Xususan, axborot yetkazish masalasida ham. Masalan, yo‘l-transport hodisalari haqidagi axborotni ochiq va muntazam beradigan mobil dastur qilsa bo‘lardi — uning maʼlumotlari asosida jamoatchilik YHXXning o‘ziga “YTH o‘choqlari”ni yo‘qotish bo‘yicha yordam berishi mumkin edi. Yoki, undan ham osonroq ish bor — qayerda qanday kamera, qanday radar turibdi, u qanday qoidabuzarliklarni qayd etadi — shuni muntazam, onlayn vaqt rejimida yangilanadigan reyestr qilib qo‘yish mumkin. Juda oson ish. YHXX shu ishni qilsa, antiradarga ham hojat qolmaydi: “Yandeks.Xarita”ga o‘xshash xizmatlar o‘sha reyestr asosida o‘z xaritalarini doimiy yangilab, YHXXning elektoratiga katta yordam qiladi. Lekin — yo‘q. YHXXdagi ayrim davlat xizmatchilari yo‘q joydan muammo yasaydi: binoyidek ishlab turgan, xalq o‘rgangan, qaysidir maʼnoda haydovchilarning og‘irini yengil qilayotgan mobil dastur (Road24) o‘rniga “o‘zining” (chalajon) mobil dasturi (SafeRoad)ni ishlab chiqadi”, deb yozadi jurnalist.
Jurnalist va bloger Qobil Xidirov mazkur masalaga haqida yozar ekan “kadrlar almashdi, ilovalar almashmoqda. Maʼnosi nedur?”, deydi.
Bloger Shuhrat Qurbonov mazkur o‘zgarish haqida yozar ekan “ChatGPT bizda chiqqanida: 15-apreldan ChatGPT ishlamaydi va tarmoqdan uziladi uning o‘rniga ChatGRT New Original ilovasini o‘rnating”, deya sarkazm qilgan.
Masʼullar harakatini qanday izohladi?
Xabar.uz jurnalisti Elbek Boymurodov Telegram’dagi guruhlarning birida “ishlab turgan ilova nega boshqasiga almashtiriladi? Biror arzirli sabab bormi?”, deya savol qoldirgach, Yo‘l harakati xavfsizligi axborot xizmati rahbari Zoyir Yo‘ldoshev bundan ko‘zlangan maqsad “fuqarolarga yanada qulaylik yaratish” ekanini aytdi.
Ilovaga kirgan odam YHXXning ko‘plab xizmatlaridan foydalanishi mumkin. Faqat jarima to‘lash emas, davlat raqam belgilariga buyurtma berish, davlat raqam belgilarini saqlash, maʼmuriy jarimadan shikoyat bildirish, jarimani bo‘lib to‘lash singari ko‘plab qulayliklarni o‘z ichiga olgan. Kelgusida aynan ushbu ilova orqali yanada ko‘proq xizmatlarni ko‘rsatish nazarda tutilgan, dedi u.
Ilovalar kimga tegishli?
Qiziquvchan Telegram kanallaridan biri eski va yangi ilovalar kimga tegishli ekanini surishtirgan.
Road24 ilovasining ommaviy oferta bo‘limida uning ishlab chiqaruvchisi Kash App MCHJ ekani ko‘rsatilgan. Korxona 2016-yil 17-mart kuni davlat ro‘yxatidan o‘tkazilgan. Ustav fondi — 165,4 mln so‘m. Rahbar sifatida Fatkulina Liniza Xalilovna ko‘rsatilgan. Firmaning 90 foiz ulushiga Hasanova Naima Muhammadjonovna, qolgan 10 foiz ulushiga esa Fatkulina Liniza Xalilovna egalik qiladi. Safe Road ilovasining ommaviy oferta bo‘limi ishlamayapti. Shunday bo‘lsa-da, App Store’da AUTODOC MCHJ nomidan ilova taqdim etilgan. Ushbu korxona 2022-yil 27-iyun kuni davlat ro‘yxatidan o‘tkazilgan. Ustav fondi — 500 ming so‘m. Rahbar sifatida Sodiqov Sayyodbek Siddiqjon o‘g‘li ko‘rsatilgan. Firmaning 100 foiz ulushi Karimov Bilol Bahodir o‘g‘liga tegishli. Shuningdek, u ORIENT IT MCHJga ham 100 foiz ulush bilan taʼsischisidir, deyiladi bu haqdagi maʼlumotda.
Kanal admini ORIENT IT MCHJ 2022-yil noyabrda Ichki ishlar vazirligi Markaziy gospitali o‘tkazgan 1,1 mlrd so‘mlik tender g‘olib bo‘lganini ochiqlagan.
Voz kechilayotgan ilova tashabbuskorlari Road24 uzluksiz ishlayotganini aytmoqda
Road24 ilovasi masʼullari “Daryo” jurnalisti bilan muloqot qilar ekan ilova uzluksiz ishlayotganini, ular haqidagi xabarlar asossiz ekanini maʼlum qildi.
Bu gaplar yolg‘on va feyk xabarlar hisoblanadi. Iltimos, bu turdagi xabarlarga ishonmang. O‘ylashimizcha barcha xabarlar yangi ilovaga odamlarni jalb qilish uchun bo‘lsa kerak, deydi Road24 ilovasi tashabbuskorlari.
“Daryo” voqealar rivojini kuzatishda davom etadi.
Izoh (0)