Erondan istalgan miqdorda neft va neft-kimyo mahsulotlarini sotib oladigan mamlakatlar va shaxslarga nisbatan AQSH ikkilamchi sanksiyalar qo‘llaydi. Bu haqda prezident Donald Tramp ma’lum qildi.
Trampning ta’kidlashicha, ushbu mamlakatlar AQSH bilan hech qanday shaklda biznes qila olmaydi. U Eron nefti yoki neft mahsulotlarining barcha xaridlarini zudlik bilan to‘xtatishga chaqirmoqda. 2024-yil aprel oyida Erondan neft eksporti 6 yil ichidagi eng yuqori ko‘rsatkichga yetgan. Mahsulot, asosan, Xitoyga yetkazib berilgan.
Politico nashri 11-aprel kuni AQSH prezidenti Eron bilan yadroviy muzokaralarda muvaffaqiyatga erishish uchun 60 kunlik muddat belgilagani haqida xabar bergandi.
Aks holda, Tehron harbiy choralarga duch kelishi mumkin, degan jurnalistlarga to‘rtta manba.
Tramp mart oyi oxirida Eron yadro dasturi bo‘yicha kelishuvga rozi bo‘lmasa, uni “bombardimon qilish” va ikkilamchi bojlar bilan tahdid qilgandi.
Agar ular kelishuvga erishmasa, bombardimon boshlanadi. Bu ular hech qachon ko‘rmagan bombardimonlar bo‘ladi, degan edi AQSH prezidenti.
Siyosatchi 9-aprel kuni Eronga qarshi harbiy kuch ishlatishga tayyorligini takrorlagan. Aprel oyi o‘rtalarida esa Ummonda ikki davlat o‘rtasida Tehron yadro dasturi bo‘yicha muzokaralarning birinchi raundi bo‘lib o‘tgan.
Ma’lumot o‘rnida, 2015-yilda Buyuk Britaniya, Germaniya, Xitoy, Rossiya, AQSH, Fransiya va Eron yadroviy kelishuvni — Eron yadroviy dasturiga cheklovlar evaziga sanksiyalarni bekor qilishni nazarda tutuvchi Qo‘shma keng qamrovli harakatlar rejasini imzoladi. AQSH Tramp prezidentligi davrida 2018-yilning may oyida ushbu kelishuvdan chiqqan va Tehronga qarshi sanksiyalarni tiklagan. Bunga javoban Eron kelishuv bo‘yicha o‘z majburiyatlarini bosqichma-bosqich qisqartirish, yadroviy tadqiqotlar, sentrifugalar va uranni boyitish darajasidagi cheklovlardan voz kechishini e’lon qilgan.
Izoh (0)