Tehron, agar xalqaro bosim kuchaysa, MAGATE (Xalqaro atom energiyasi agentligi) bilan hamkorlikni to‘xtatishi va tashkilot inspektorlarini mamlakatdan chiqarib yuborishi mumkin. Bu haqda Eron oliy rahnamosi Ali Xomanaiyning maslahatchisi Ali Shamxoniy ma’lum qildi.
Shamxoniyga ko‘ra, AQSH tomonidan tahdidlar davom etsa, Eron o‘z yadroviy faoliyatini himoya qilish maqsadida “siyosiy tiyib turuvchi choralarni” qo‘llashga majbur bo‘ladi.
“Boyitilgan yadroviy materiallarni Eron ichkarisidagi yashirin va xavfsiz joylarga ko‘chirish masalasi ham kun tartibida bo‘lishi mumkin”, deya ta’kidladi u.
Mazkur bayonot Donald Tramp Eronga qarshi harbiy kuch qo‘llash ehtimolini yana tilga olganidan so‘ng e’lon qilindi. AQSH prezidenti Tehron yadroviy kelishuvga rozi bo‘lmasa, muzokaralar to‘xtashi va bu Eron uchun “katta xavf tug‘dirishi” mumkinligini bildirgan.
AQSH va Eron diplomatlari 12-aprel kuni Ummonda yadro dasturi yuzasidan muzokaralarni boshlashi kutilmoqda. Tramp bu borada yakuniy qaror o‘zi tomonidan qabul qilinishini bildirgan. Oq uy muzokaralar bevosita olib borilishini ma’lum qilgan bo‘lsa-da, Eron tomoni jarayon Ummon tashqi ishlar vaziri vositachiligida bilvosita kechishini ta’kidlagan.
Ma’lumot uchun, 2015-yilda Eron yadro dasturi bo‘yicha G‘arb davlatlari bilan kelishuvga erishgan va buning evaziga xalqaro sanksiyalarning bir qismidan xalos bo‘lgan edi. Biroq Donald Tramp prezidentlik davrida Qo‘shma Shtatlarni kelishuvdan chiqarib, keng ko‘lamli sanksiyalarni tiklagan. Shundan so‘ng Eron yadroviy faoliyatini kengaytirgan.
MAGATE ma’lumotlariga ko‘ra, hozirda Tehron uranni boyitish bo‘yicha kelishuvda belgilangan limitlardan ancha oshgan. G‘arb davlatlari Eronni yashirin tarzda ommaviy qirg‘in qurollari ishlab chiqishga urinishda ayblaydi. Tehron esa yadro dasturining faqat tinch maqsadlarga yo‘naltirilganini ta’kidlab kelmoqda.
Izoh (0)