Janubiy Koreya to‘rtinchi razvedka sun’iy yo‘ldoshini muvaffaqiyatli uchirishga erishdi. Bu haqda mamlakat Mudofaa vazirligiga asoslanib, Yonhap agentligi xabar bermoqda.
Parvozni Janubiy Koreya hukumati manfaatlarini ko‘zlab AQSHning SpaceX kompaniyasi amalga oshirgan. Sun’iy yo‘ldosh o‘rnatilgan Falcon 9 raketasi 21-aprel kuni Florida shtatidagi Kanaveral burnidagi AQSH Kosmik kuchlari bazasidan uchirilgan. KXDRni kuzatish uchun mo‘ljallangan sun’iy yo‘ldosh uchirilganidan 15 daqiqa o‘tgach Yer atrofidagi orbitaga joylashtirilgan.
Koreya Respublikasi beshinchi razvedka sun’iy yo‘ldoshini shu yil oxirida uchirishni rejalashtirmoqda.
2024-yil avgust oyida SpaceNews nashrining xabar berishicha, Janubiy Koreya aerokosmik agentligi 2027-yilning ikkinchi yarmida GEO-KOMPSAT-3 ko‘p maqsadli geostatsionar aloqa sun’iy yo‘ldoshini uchirish uchun AQSHning SpaceX kompaniyasining Falcon 9 raketasini tanlagan.
O‘sha yilning iyun oyida portal Janubiy Koreyaning Oy va Marsga missiyalar yuborish rejalarini e’lon qilgan edi.
Izoh (0)