Shimoliy Koreyaning poytaxti Pxenyanda kompyuterlari bo‘lmagan birinchi kompyuter klubi ochildi. Mamlakat rahbari Kim Chen In obyektga tashrif buyurdi. Bu haqda NK News xabar berdi.
Ma’lum qilinishicha, klub 300 kishiga mo‘ljallangan bo‘lib, fuqarolarning moddiy va madaniy farovonligiga hissa qo‘shishga qaratilgan. Klubdan olingan suratlarda kompyuter va monitorlar yo‘qligini ko‘rish mumkin. Shu bilan birga, klubda ko‘plab bilyard stollari va o‘yin kreslolari mavjud.
Manbaga ko‘ra, KXDR rasmiylari o‘yin materiallari mazmunini sinchkovlik bilan nazorat qiladi. Klubga keladiganlarga xorijiy o‘yinlarning siyosatga xavf solishi mumkin bo‘lgan qismlari olib tashlangan versiyalari taklif qilinishi mumkin. Bu loyiha mamlakatda dam olish infratuzilmasini kengaytirish dasturining bir qismi bo‘lishi kutilmoqda.
KXDRning birinchi kompyuter klubida qanday uskunalar ishlatilishi va qachon yetkazib berilishi kutilayotganiga aniqlik kiritilmagan. Ehtimol, Shimoliy Koreya sanksiyalarni chetlab o‘tish uchun zarur butlovchi qismlarni olib kirish yo‘llarini izlashi kerak bo‘ladi.
Dunyoga mashhur KXDR xakerlari
Shimoliy Koreya xakerlari so‘nggi yillarda bir nechta yirik kiberhujumlar uyushtirib, global xavfsizlikka tahdid qilmoqda. 2017-yildan beri ular qariyb 3 milliard dollarlik kriptovalyutalarni o‘g‘irlashga muvaffaq bo‘lgan, shu jumladan 2023-yilda 600 milliondan 1 milliard dollargacha mablag‘ o‘g‘irlangan. O‘sha yilning fevral oyida Shimoliy Koreya xakerlari Bybit kripto birjasiga qarashli 1,5 milliard dollarlik raqamli valyutani o‘zlashtirgan.
KXDR xakerlari, shuningdek, Janubiy Koreya siyosatchilariga kiberhujumlar uyushtirib, ularning shaxsiy ma’lumotlarini o‘g‘irlagani haqida ma’lumotlar mavjud. Buning oqibatida ular Janubiy Koreyaga nisbatan 626 million AQSH dollari miqdorida zarar yetkazgan. Bundan tashqari, Shimoliy Koreya xakerlari AQSH va boshqa davlatlarning harbiy ma’lumotlarini o‘g‘irlash uchun global kiberjosuslik kampaniyalarini amalga oshirayotgani ta’kidlanadi.
Izoh (0)