AQSH Tinch okeani mintaqasi qo‘mondoni admiral Samuel Paparo Senat Qurolli kuchlar qo‘mitasiga bayonot berib, Shimoliy Koreyaning Rossiyaga harbiy yordamini jiddiy xavf sifatida baholadi. Unga ko‘ra, Pxenyan rus armiyasiga yuzlab qisqa masofali ballistik raketalar va yuz minglab artilleriya snaryadlarini yuborgan.
Paparo bu harakatni “ikki davlat zaif tomonlarini o‘zaro birgalikda to‘ldirayotgan transaksion simbioz” deb atadi. Uning aytishicha, Moskva bunga javoban ittifoqchisiga zamonaviy havo mudofaa tizimlari, jumladan, yer-havo raketa tizimlarini yetkazib bermoqda.
Tahlilchilarga ko‘ra, qo‘mondonning Senatdagi chiqishi Vashington Pxenyan va Moskva o‘rtasidagi harbiy hamkorlik aloqalarining chuqurlashib borayotganidan jiddiy xavotirda ekanini ko‘rsatadi.
Janubiy Koreya nashrlarining xabar berishicha, Pxenyan 2024-yilning mart oyi oxirigacha Rossiyaga qurol-yarog‘larning navbatdagi patiyasini yuborgan. Jo‘natma tarkibida 122 mm va 152 mm kalibrli artilleriya snaryadlaridan tashqari KN-23 qisqa masofali ballistik raketalari ham bo‘lgani taxmin qilinmoqda.
Buyuk Britaniyada joylashgan Conflict Armament Research tashkiloti 2024-yilning iyul va avgust oylarida Ukrainada shaharlariga uchirilgan raketalar qoldiqlarining o‘rganib, ularning to‘rttasi Shimoliy Koreyada ishlab chiqarilganini aniqladi. E'tiborlisi, ular o‘sha yilning o‘zida ishlab chiqarilgan raketalar bo‘lib chiqqan.
Bu Shimoliy Koreya raketalari ishlab chiqarilganidan atigi bir necha oy o‘tib Ukrainada ishlatilganini ko‘rsatadigan birinchi ochiq dalildir. Ya’ni, bu yillar emas, balki oylar masalasi”, degan tashkilot rahbari Leff BMT Xavfsizlik Kengashida chiqish qilib.
AQSH razvedka xizmati va mulozimlari Shimoliy Koreya Rossiyaga qurol-yarog‘ yetkazib berayotgani haqidagi xabarlarni avval ham bir necha bor tasdiqlagan edi. Ammo admiral Paparoning so‘zlari bu boradagi eng jiddiy bayonotlardan biri sifatida baholanmoqda.
Mutaxassislar fikricha, Pxenyan va Moskva o‘rtasidagi o‘zaro almashinuv Shimoliy Koreya uchun strategik imkoniyat bo‘lishi mumkin. Rasmiylar Pxenyanning harbiy texnologik salohiyati kuchayishidan xavotirda.
Izoh (0)