Koreya Respublikasi armiyasi Shimoliy Koreya tomonidan bo‘lishi mumkin bo‘lgan provokatsiyalarga tayyorgarlikni oshirish maqsadida dengiz chegarasi yaqinida o‘q otish bo‘yicha keng ko‘lamli tungi harbiy mashg‘ulotlar o‘tkazdi. Bu haqda Yonhap agentligi ma’lum qilmoqda.
Agentlikning ma’lum qilishicha, mashqlarda 40 ga yaqin asosiy texnika vositalari, jumladan, K9A1 o‘ziyurar gaubitsa, Chunmoo reaktiv o‘t ochish quroli hamda kontrbatareya radari va uchuvchisiz uchish apparati kabi kuzatuv vositalaridan foydalanilgan.
Mashqlar Seuldan taxminan 160 km shimoli-sharqda joylashgan qirg‘oqbo‘yi Koson tumanida o‘tkazilgan. Unda jami 300 nafarga yaqin harbiy xizmatchi qatnashgan.
“Mashqlar davomida qo‘shinlar radar yordamida shartli raqibning tahdidini aniqladi va unga javoban o‘t ochdi. So‘ngra ular dronlar yordamida natijani tasdiqlab, yana o‘t ochishdi va shu tariqa yashin tezligidagi o‘t ochish qudratini namoyish etishdi”, deyiladi xabarda.
Ta’kidlanishicha, mashg‘ulotlar boshlanishidan oldin mahalliy aholi qirg‘oq qo‘riqchilari bilan hamkorlikda xavfsizlik qoidalari bilan tanishtirilgan.
8-aprel kuni Janubiy Koreya ikki davlat chegarasidan o‘tuvchi demarkatsiya chizig‘ini kesib o‘tgan Shimoliy Koreya askarlari guruhiga ogohlantiruvchi o‘t ochgandi.
17-21-mart kunlari Janubiy Koreya va AQSH Shimoliy Koreyaning yerosti tunnellari va asosiy yerosti inshootlarini egallashga qaratilgan qo‘shma harbiy mashg‘ulotlarni boshladi.
Izoh (0)